रायपुर ड्रग्स केस म नया मोड़: ड्रग्स क्वीन नव्या मलिक के खजाना ला खंगालही ED
navya malik drugs case : रायपुर : छत्तीसगढ़ के चर्चित नव्या मलिक ड्रग्स केस म अब जांच के दायरा ह बड़ गे हे। कथित ड्रग्स क्वीन नव्या मलिक ले जुड़े मामला म अब प्रवर्तन निदेशालय (ED) ह अपन कार्रवाई तेज कर दे हे। ईडी ह रायपुर पुलिस ले ए मामला के जम्मो दस्तावेज, चार्जशीट अउ जांच ले जुड़े रिकॉर्ड मन ला मांग ले हे। अब एजेंसी ह ड्रग्स नेटवर्क के संग-संग पइसा के लेन-देन, बैंक खाता, संपत्ति अउ कथित अवैध कमाई के जरिया मन के जांच करही। ईडी के एंट्री के बाद ए मामला ले जुड़े दूसर लोगन मन ऊपर घलो नजर अउ बढ़ गे हे।
ED के जांच: कहां गीस ड्रग्स कारोबार के पइसा? ईडी अब ए बात के पता लगाय के कोसिस करही कि कथित ड्रग्स कारोबार ले कमाए गे रकम ला कहां निवेश करे गे राहिस, कउन-कउन खाता मन म पइसा पहुंचिस अउ ओला छुपाय या वैध देखाय बर का-का तरीका मन के इस्तेमाल करे गीस। जांच के दायरा म बैंक खाता, डिजिटल ट्रांजेक्शन, संपत्ति अउ संदिग्ध निवेश सामिल हो सकत हें। ईडी के एंट्री के बाद ओ लोगन मन ऊपर घलो नजर बढ़ गे हे, जेकर नाम जांच के दौरान आगू आय राहिस, संग ही जे मन चार्जशीट के हिस्सा नहीं बन पाय रीहिन।
कैसे सुरू होय राहिस रायपुर ड्रग्स केस? ए हाईप्रोफाइल मामला के सुरूआत 23 अगस्त 2025 कूं होईस। रायपुर पुलिस ह एमडीएमए ड्रग्स के संग हर्ष आहूजा, मोनू विश्नोई अउ दीप धनोरिया ला गिरफ्तार करे राहिस। पूछताछ के दौरान मिले सुराग के आधार म पुलिस के जांच ह मुंबई तक पहुंचिस, जहां ले नव्या मलिक ला गिरफ्तार करे गीस। पुलिस के मुताबिक, नव्या ऊपर आरोप राहिस कि वोहा रायपुर के हाईप्रोफाइल सर्किल म सक्रिय एक बड़े ड्रग्स नेटवर्क ले जुड़े राहिस।
कउन हे नव्या मलिक? नव्या मलिक रायपुर के कटोरा तालाब इलाका के रहइया आय। पुलिस जांच म ओकर नाम कथित ड्रग्स नेटवर्क ले जुड़े आगू आय राहिस। ए मामला के बाद वोहा रायपुर के सबले चर्चित ड्रग्स परकरन मन के केंद्र बन गीस। पुलिस जांच के दौरान ओकर संपर्क अउ नेटवर्क ला लेके कतकोन बड़े दावा करे गे रीहिन, जेकर बाद ए मामला ह बड़ सुरखी म आईस।
मोबाइल जांच म मिले राहिस 850 संपर्क के दावा मामला ह ओ समे अउ जादा चर्चा म आईस जब पुलिस ह दावा करिस कि नव्या मलिक के मोबाइल फोन के जांच म करीब 850 प्रभावशाली लोगन मन के संपर्क मिले राहिस। जांच म नेता, बड़े कारोबारी परिवार, होटल इंडस्ट्री ले जुड़े लोगन, ऑटोमोबाइल कारोबारी, क्लब संचालक अउ नाइटलाइफ सर्किट ले जुड़े लोगन मन के नाम आगू आय के बात कहे गे राहिस। हालांकि, ए लोगन मन के पहचान सार्वजनिक नहीं करे गीस अउ जादा तर नाम चार्जशीट म सामिल नहीं हो पाइन।
ED जांच ले बढ़ सकत हे नेटवर्क के लोगन मन के मुसकिल अब ईडी के जांच सुरू होय के बाद ए मामला के आर्थिक पहलू ला सबले अहम माने जात हे। एजेंसी ह ए पता लगाय के कोसिस करही कि कथित ड्रग्स नेटवर्क के पइसा ह किसन चले अउ एकर पाछू कउन-कउन से आर्थिक कनेक्शन जुड़े राहिस। ईडी के जांच आगू बढ़े के संग ए मामला म कतकोन नवा खुलासा होय के संभावना जताय जात हे।
