पीएम किसान सम्मान निधि के 23वां क़िस्त जारी, छत्तीसगढ़ के 24 लाख किसान मन के खाता म पहुंचिस 490 करोड़ रुपिया
pm kisan 23rd installment : रायपुर: प्रधानमंत्री किसान सम्मान निधि (PM-KISAN) योजना के 23वीं किसत ह संनिच्चर के दिन जारी कर दे गिस। प्रधानमंत्री नरेंद्र मोदी ह पश्चिम बंगाल के हुगली जिला के तारकेश्वर म आयोजित एक बड़े कार्यक्रम म बटन दबाके किसान मन के खाता म रुपिया ट्रांसफर करिन। ए किसत के तहत देस भर के 9.44 करोड़ ले जादा किसान मन ल सीधा फायदा मिलिस हे। डीबीटी (DBT) के माध्यम ले किसान मन के बैंक खाता म 18,880 करोड़ रुपिया ले जादा के रासि भेजे गे हे। सरकार के कहना हे कि ए योजना के उदेस ह किसान मन ल आर्थिक मदद देके ओमन के आमदनी अउ गांव के अर्थव्यवस्था ल मजबूत करना आय।
छत्तीसगढ़ के किसान मन ल मिलिस 490 करोड़ रुपिया
ए योजना के बड़का लाभ छत्तीसगढ़ के किसान भाई मन ल घलो मिलिस हे। प्रदेश के 24 लाख ले जादा किसान मन के बैंक खाता म 490 करोड़ रुपिया ले जादा के रासि डीबीटी के माध्यम ले सीधा पहुंच गे। ए मउका म मुख्यमंत्री विष्णु देव साय ह जशपुर जिला के कुनकुरी म बने स्वामी आत्मानंद उत्कृष्ट अंग्रेजी माध्यम स्कूल, सलियाटोली म आयोजित वर्चुअल कार्यक्रम म सामिल होइन अउ किसान मन ल संबोधित करिन।
किसान मन के संबृद्धि ह विकसित छत्तीसगढ़ के नेव आय: CM साय
मुख्यमंत्री विष्णु देव साय ह कहिन कि किसान मन के सुघर दिन अउ खुशहाली च विकसित भारत अउ विकसित छत्तीसगढ़ बनाए के असली नेव आय। ओमन कहिन कि प्रधानमंत्री किसान सम्मान निधि जइसन योजना मन ह किसान मन ल आर्थिक रूप से मजबूत बनावत हें। ए योजना मन ले किसान मन ल आर्थिक सुरक्षा मिले के संग ओमन के अतमबल अउ सम्मान घलो बढ़त हे। सरकार ह किसान मन के आय बढ़ाए अउ खेती-किसानी के छेत्र ल मजबूत करे बर लगातार बूता करत हे।
खेती-किसानी ल मजबूत करे म सरकार के जोर
मुख्यमंत्री ह आगू कहिन कि प्रदेश सरकार ह किसान मन के खुशहाली ल पहिली सुध लेवत खेती-किसानी म नवा तकनीक, सिंचई के साधन मन के बिसतार, सुघर बजार बेवस्था अउ कृषि उपज मन के सही दाम देवाय म लगे हे। ओमन कहिन कि सरकार के उदेस ह किसान मन ल सिरिफ फसल उगाए तक सीमित रखना नई हे, बल्कि ओमन ल खेती के बियापार अउ मूल्य आधारित कृषि ले जोड़ना हे, जेकर से ओमन के कमाई म थिर बढ़ती हो सके। किसान मन के आर्थिक मजबूती ले हमर गांव-घर के अर्थव्यवस्था ल घलो नवा गती मिलही।
