जेल के बाथरूम मा फंदा ले लटके मिलिस कैदी के शव, सुरक्षा ऊपर उठिस बड़े सवाल
Janjgir Champa News : जांजगीर-चांपा। छत्तीसगढ़ के जांजगीर-चांपा जिला जेल के भीतोर ले एक सनसनीखेज मामला अगम आए हे, जिहां जेल के अंदर एक कैदी के लास बाथरूम मा फांसी के फंदा ले लटके मिले हे। ये घटना ले पूरा जेल परिसर मा हड़कंप मच गे हे अउ जेल के सुरक्षा व्यवस्था ऊपर कतको सवाल खड़े होवत हें। मामला के जानकारी मिलते च कोतवाली पुलिस अउ फॉरेंसिक टीम ह मौका मा पहुंच के जांच सुरू कर दे हे। बताए जात हे कि दुष्कर्म के मामला मा ओला एक दिन पहिली च जेल मा दाखिल करे गिस रिहिस।
मिले जानकारी के मुताबिक, ये घटना ओ समे समना आईस जब बिहनिया सफाईकर्मी मन बाथरूम के सफाई करे बर पहुंचे रिहिन। भितरी के हाल ला देख के जेल स्टाफ ह तुरंते बड़े अधिकारी मन ला खबर करिस, जेकर बाद कोतवाली पुलिस ला सूचना दिय गिस।
एक दिन पहिली च जेल भेजे गिस रिहिस आरोपी
मरे हुए कैदी के चिनहारी दुवास राम के रूप मा होए हे, जेला एक दिन पहिली च दुष्कर्म के मामला मा जेल दाखिल करे गिस रिहिस। बताए जात हे कि वोहा कोरबा जिला के बांकीमोंगरा थाना क्षेत्र के जवाली गांव के रहइया रिहिस। ओला 8 जून के बलौदा पुलिस ह नाबालिग लइका ला बहला-फुसला के ले जाय, अपहरण अउ अनाचार के मामला मा गिरफ्तार कर के जेल भेजे रिहिस।
बाथरूम मा कपड़ा के फंदा बना के लटकिस लास
जानकारी के अनुसार, कैदी के लास जेल के बाथरूम मा ओकर खुद के कपड़ा ले बनाए फंदा के सहारे खिड़की ले लटके मिलिस। घटना के खबर तुरंते ओकर घर वाला मन ला दिय गिस। परिजन मन के मौजूदगी मा पंचनामा के कारवाही के बाद लास ला पोस्टमार्टम बर भेज दिय गे हे। कोतवाली पुलिस, फॉरेंसिक टीम अउ साइबर सेल ह मौका मा पहुंच के जांच मा जुटे हें।
पुलिस के का कहना हे
जांजगीर सीएसपी योगिता खापर्डे ह बताइस कि दुवास राम केंवट ह एक नाबालिग लइका ला बहला-फुसला के ले गे रिहिस, जेकर बाद बलौदा पुलिस ह 8 जून के कारवाही करत ओला अपहरण अउ अनाचार के मामला मा गिरफ्तार कर जेल दाखिल कराए रिहिस। ओमन बताइन कि जेल के अंदर का होईस अउ दुवास राम ह आत्महत्या काबर करिस, या ओकर हत्या करे गे हे, इकर अभी खुलासा नई हो पाए हे। मामला के जांच जारी हे अउ पोस्टमार्टम रिपोर्ट आए के बाद च असल बात समना आही।
जेल सुरक्षा ऊपर गंभीर सवाल
जेल के भितरी होए ये घटना ह सुरक्षा व्यवस्था ऊपर बड़े सवाल खड़े कर दे हे। आखिर 21 बछर के दुवास राम के संग जेल के अंदर अइसन का होईस कि ओकर मौत हो गे, येहा बड़ जांच के विषय बने हे। पुलिस ह मामला के बारिकी ले जांच करत हे। फॉरेंसिक अउ साइबर शाखा के टीम घलो हर कोना ले पड़ताल मा जुटे हे। अभी यहू साफ नई हे कि मामला आत्महत्या के आय या फिर हत्या के। अब पोस्टमार्टम रिपोर्ट आए के बाद च मौत के असली कारन के पता चल पाही।
