छत्तीसगढ़ म 21 जून के NEET UG री-एग्जाम, 19 शहर म बनही 127 परीक्षा केंद्र
NEET UG Re Exam Chhattisgarh : रायपुर। छत्तीसगढ़ म आघू आवइया 21 जून को होवइया NEET (UG) 2026 के दोबारा परीक्षा (री-एग्जाम) ला लेके प्रसासन के तैयारी अब्बड़ तेज होगे हे। परीक्षा ला बढ़िया अउ सुरक्षित तरीका ले निपटाए बर राज सरकार ह पूरा अलर्ट मोड म नजर आवत हे। ए सिलसिला म मुख्य सचिब विकासशील के अगवाई म मंत्रालय महानदी भवन म एक बड़े बइठक रखे गिस, जउंहा वीडियो कॉन्फ्रेंसिंग के जरिया जम्मो जिला के कलेक्टर अउ पुलिस अधीक्षक (SP) मन सामिल होइन।
बइठक म परीक्षा के ब्यवस्था, सुरक्षा अउ कानून ब्यवस्था ला लेके ग्वाहिरा गोठ-बात होईस। मुख्य सचिब ह कड़ा निरदेस दिन कि केंदर सरकार अउ राष्ट्रीय परीक्षा एजेंसी (NTA) के जम्मो नियम मन के कड़ाई ले पालन होना चइही, ताकि परीक्षा म कोनो गड़बड़ी झन होवय।
19 सहर म बनही 127 परीक्षा केंदर
राष्ट्रीय परीक्षा एजेंसी (NTA) के महानिदेशक अभिषेक सिंह ह बइठक म बताइस कि छत्तीसगढ़ म NEET UG री-एग्जाम के आयोजन 19 सहर मन म करे जाही। एकर बर कुल 127 परीक्षा केंदर (एग्जाम सेंटर) बनाए गय हें। ओमन जिला प्रसासन ला कहे हें कि परीक्षा केंदर मन म जम्मो जरूरी सुबिधा अउ सुरक्षा के इंतजाम समे रहत पूरा कर लेवाय।
परीक्षा केंदर मन के पहिली ले होही जांच
मुख्य सचिब ह जम्मो कलेक्टर अउ एसपी मन ला परीक्षा के पहिली खुद जाके केंदर मन के मुआयना करे बर कहे हे। ओमन निरदेस दिन कि परीक्षा के दिन लइका मन ला केंदर तक पहुंचे म कोनो दुख-तकलीफ झन होवय। रस्ता म भीड़-भाड़ ला रोके अउ यातायात ला सुघ्घर रखे बर खास योजना बनाए बर कहे गिस हे।
योग दिवस के दिन परीक्षा, प्रसासन ला बिसेस हुसियार रहने के निरदेस
21 जून के दिन अंतर्राष्ट्रीय योग दिवस घलो मनाए जाही। एला देखत हुए मुख्य सचिब ह अधिकारी मन ला जादा हुसियार रहने बर कहे हे। योग दिवस के कार्यक्रम के सेती कोनो भी परीक्षा केंदर के रस्ता म बाधा झन आना चइही अउ लइका मन समे म परीक्षा देवइ पहुंच जांय, ए बात के पूरा ध्यान रखे जाही।
लइका मन के काउंसलिंग ऊपर जोर
मुख्य सचिब ह कहिस कि परीक्षा देवइया लइका मन ला डरे के कोनो जरूरत नई हे। ओमन जिला शिक्षा अधिकारी अउ मुख्य चिकित्सा अधिकारी मन के एक संयुक्त टीम बनाके लइका मन के काउंसलिंग कराए के निरदेस दिन, ताकि ओमन बिना कोनो तनाव अउ चिंता के परीक्षा दे सकें।
20 जून के होही मॉक ड्रिल
तैयारी मन ला परखे बर परीक्षा के ठीक एक दिन पहिली यानी 20 जून के मॉक ड्रिल (रिहर्सल) करे जाही। ए दउर म सुरक्षा, पेपर मन के रख-रखाव, यातायात अउ कंट्रोल रूम के संचालन जइसन जम्मो ब्यवस्था मन ला जांचे जाही।
एयर फोर्स के जरिया आही पेपर अउ OMR शीट
बइठक म बताए गिस कि परीक्षा के प्रश्न पत्र (पेपर) अउ OMR शीट ला एयर फोर्स के जरिया अलग-अलग जिला मन म पहुंचाए जाही। एला सुरक्षित रखे के पूरा जिम्मेदारी जिला प्रसासन अउ पुलिस बिभाग के रहिही। सुरक्षा म कोनो भी किसम के लापरवाही बर्दाश्त नई करे जाही।
हर जिला म बनही कंट्रोल रूम
परीक्षा के पल-पल के खबर रखे बर हर एक जिला म कंट्रोल रूम बनाए के निरदेस दिए गिस हे। परीक्षा के दिन ये कंट्रोल रूम ह पूरा सक्रिय रहिही अउ कोनो भी आपात स्थिति ले निपटे बर बिसेस टीम घलो तैनात रहिही।
