Mivan Steel Plant : रायपुर। छत्तीसगढ़ के रायपुर जिला के एक स्टील प्लांट में मंगरवार के बिहनिया ब्लास्ट होए के सेती भयानक आग लग गे। आरंग इलाका के मंदिर हसौद में बने मिवान स्टील लिमिटेड प्लांट में ये हादसा होए हे। आग अतकी जबर हे कि करिया धूंआ के गुब्बार कतको किलोमीटर दूरिहा से साफ दिखाई देवत हे। घटना के बाद से पूरा इलाका में हड़कंप मच गे हे।

जानकारी के मुताबिक, बिहनिया करीब 5:30 बजे प्लांट में आग लगे के खबर मिलीस। देखत-देखत आग हा विकराल रूप धर लिस अउ प्लांट के एक बड़े हिस्सा ला अपन चपेट में ले लिस। खबर मिलते च दमकल के कतको गाड़ियां मउका में पहुंचिन अउ आग बुझाए के बुता चालू करिन।

आसपास के लोगन मन के बताए के बाद प्रशासन अउ पुलिस के टीम मामला के गंभीरता ला देखत तुंरत मउका में पहुंच गे हे। बड़े अधिकारी मन के देखरेख में राहत अउ बचाव के काम जारी हे। अभी तक आग लगे के असली कारन पता नहीं चल पाए हे, अउ न ही ककरो हताहत होए के कोनो आधिकारिक पुष्टि होए हे।

मउका में मौजूद तहसीलदार विनोद साहू हा बताइन कि मिवान स्टील प्लांट में आग लगे के जानकारी मिले हे। दमकल, प्रशासन अउ पुलिस के टीम मउका में डटे हे। आग कइसे लगिस अउ कतका नुकसान होए हे, एकर जांच करे जात हे।

अभी घलो स्टील प्लांट में लगे भयानक आग ला बुझाए के उदीम करे जात हे अउ प्रशासन पूरा घटनाक्रम ऊपर नजर रखे हुए हे।