हिमाचल मा बड़े हादसा : 500 फीट गहरा खाई मा गीरीस कार, छत्तीसगढ़ के एक ही परिवार के 4 झन समेत 8 के मौत
Chamba Car Accident : दुर्ग। हिमाचल प्रदेस के चंबा जिला मा एक बड़ दरदनाक हादसा होए हे, जहां एक कार ह 500 फीट गहिरी खाई मा गिर गे। ए दुर्घटना मा 8 झन के मौत हो गे हे, जेमा छत्तीसगढ़ के भिलाई के रहइया 4 झन घलो सामिल हें। ये सबो झन बेंगलुरु ले हिमाचल घूमे बर आए रीहिन अउ साच पास मा बरफबारी के नजारा देखे बर जावत रीहिन, एही बीच ए हादसा हो गे।
बैंगलोर ले घूमे बर गए रीहिस परिवार
भिलाई मरोदा के रहइया अरविंद चन्द्राकर ह अपन पत्नी प्राची चन्द्राकर अउ परिवार के साथ कतको बछर ले बैंगलोर मा रहत रीहिस। वे मन बैंगलोर ले ही हिमाचल घूमे बर गए रीहिन। सुकरवार के दुपेर मन क क डलहौजी ले एक टैक्सी बुक करे रीहिन, जेमा 8 झन बइठे रीहिन। एखर बाद वे मन साच पास जोत क्षेत्र कोती रवाना होए रीहिन।
रात कुन ओखर गाड़ी ह सड़क ले नीचे गहिरी खाई मा गिर गे। खाई ह बड़ गहिरी अउ सोझ होए के सेती गाड़ी ह पूरी तरहां ले टूट-फूट गे। ए हादसा मा पति अरविंद चन्द्राकर, पत्नी प्राची चन्द्राकर अउ ओखर दोनो लइका मन समेत 8 झन के मौका मा ही मौत हो गे।
जीपीएस लोकेशन ले मिलिस सुराग
हादसा के पता तब चलीस जब टैक्सी ह रात तक डलहौजी वापस नई लौटिस। गाड़ी मालिक ला संसो होइस त ओ ह जीपीएस लोकेशन चेक करीस। लोकेशन कालावन क्षेत्र के तीर मा एकही जघा मा थिर (रुके हुए) दिखत रीहिस। कतको बेर तक कोनो हलचल नई होए मा स्थानीय स्तर मा खोज-पड़ताल सुरु करेगीस।
सनिवार के दुपेर के बाद गाड़ी के खाई मा गिरे के जानकारी मिलिस, जेखर बाद पुलिस अउ प्रशासन ला खबर करेगीस। इहां मोबाइल नेटवर्क नई होए के सेती रेस्क्यू टीम अउ प्रशासन के बीच गोठ-बात करे मा घलो बड़ अड़चन आईस।
मनुख मन ह चेन बना के निकारिन लास
इतवार के बिहनिया पुलिस, प्रशासन अउ उहां के रहइया मन मिलके बड़ पैमाना मा रेस्क्यू अभियान चलाइन। खाई के गहिराई अउ कड़ा परिस्थिति ला देखत हुए लोगन मन ह एक-दूसर के हाथ धर के (ह्यूमन चेन) बनाइन अउ रस्सा के मदद ले एक-एक करके लास मन ला ऊपर सड़क तक पहुंचाइन। कतको घंटा तक चले ए अभियान के बाद सबो 8 लास मन ला खाई ले बाहर निकार लीस गे हे।
