भाजपा विधायक ले ठगी करइया ओडिशा ले धराइस, रायपुर पुलिस ला मिलीस बड़का सफलता
रायपुर। छत्तीसगढ़ के भाजपा विधायक पुरंदर मिश्रा ले ठगी करइया शातिर आरोपी ला रायपुर कमिश्नरेट पुलिस ह ओडिशा ले गिरफ्तार कर लेवे हे। आरोपी ला रायपुर लाए जात हे, जेकर पुलिस ह जल्दी च खुलासा करही। ठग ह अपन आप ला भाजपा के राष्ट्रीय नेता नितिन नवीन के पीए बताके विधायक ले 10 हजार रुपिया ठग ले रहीस।
बड़े नेता के पीए बताके मांगे रहीस रुपिया
जानकारी के मुताबिक, आरोपी ह विधायक पुरंदर मिश्रा ला फोन करके अपन आप ला भाजपा के वरिष्ठ नेता नितिन नवीन के पीए बताइस। ओ हर कीस कि ओहा भुवनेश्वर जात हे अउ रद्दा म ड्राइवर ले विपाद होय के कारन परेशानी म फंस गे हे। ओहा डीजल भरवाए अउ तुरत जरूरत के हवाला देके रुपिया के मांग करिस। आरोपी ह अपन सोशल मीडिया प्रोफाइल म नितिन नवीन समेत कतको बड़े भाजपा नेता मन के संग फोटो लगा के रखे रहीस, जेकर से ओकर ऊपर आसानी ले भरोसा हो गे। विधायक ह जगन्नाथ मंदिर के सेवक नारायण मिश्रा के माध्यम ले आरोपी के खाता म 10 हजार रुपिया ट्रांसफर करवा दीस।
दोबारा रुपिया मांगे म होईस संसो, अइसने खुलगे पोल
करीब डेढ़ घंटा के बाद आरोपी ह जब दोबारा रुपिया के मांग करिस, त विधायक पुरंदर मिश्रा ला संसो (संदेह) होईस। ओमन सोचिन कि भुवनेश्वर के दूरी ला देखत अतका जल्दी ओहां पहुंचना अउ दोबारा रुपिया मांगना गड़बड़ लागत हे। एकर बाद विधायक ह सोझे नितिन नवीन के दफ्तर म फोन करिस, जहां पता चलीस कि ओ नाम के कोनो आदमी ओहां कामेच नहीं करे। ठगी के अहसास होवई च खम्हारडीह थाना म अज्ञात आरोपी के खिलाफ एफआईआर दरज कराए गीस।
तकनीकी सबूत के आधार म ओडिशा ले गिरफ्तारी
शिकायत मिले के बाद पुलिस ह मोबाइल नंबर, बैंक खाता अउ तकनीकी सबूत मन के आधार म जांच सुरू करिस। आरोपी के लोकेशन ओडिशा म मिले म रायपुर पुलिस के टीम ह ओहां दबिश देके ओला धर दबोचिस। पुलिस अब इही पता लगाए म जुटे हे कि आरोपी ह अइसने अउ कतका लोगन मन ला अपन ठगी के सकार बनाए हे।
विधायक के जनता ले अपील: बिना जांच करे झन करव लेनदेन
ए घटना के बाद विधायक पुरंदर मिश्रा ह आम जनता ले सचेत रहे के अपील करे हे। ओमन कहिन कि कोनो भी अनजान नंबर ले फोन आए या रुपिया मांगे म तुरत भरोसा झन करव। सबले पहिली ओ आदमी ले सोझे संपर्क करके जानकारी के जांच कर लव अउ पूरा भरोसा होय के बाद च कोनो रुपिया-पैसा के लेनदेन करव।
राजधानी म वीआईपी मन पहिली घलो हो चुके हें सकार
बता दन कि राजधानी रायपुर म भाजपा नेता मन ला निशाना बनाए के ए कोनो पहिली मामला नोहे। एकर पहिली देवेंद्र नगर इलाका म मॉर्निंग वॉक के बेरा पूर्व विधानसभा अध्यक्ष धरमलाल कौशिक ले मोबाइल लूटे के घटना हो चुके हे, हालांकि ओ मामला म पुलिस ह सिरिफ 8 घंटा के भीतर आरोपी ला गिरफ्तार कर ले रहीस।
