इबोला वायरस ला लेके छत्तीसगढ़ म हाई अलर्ट: रायपुर एयरपोर्ट म जम्मो यात्री मन के होही जांच
Chhattisgarh Ebola Alert : रायपुर। दुनिया के कुछ देस मन म पसरत खतरनाक इबोला वायरस ला लेके छत्तीसगढ़ सरकार ह पूरा तरीका ले चौकन्ना होगे हे। राज्य के स्वास्थ्य विभाग ह एला लेके पूरा प्रदेश भर म हाई अलर्ट जारी कर दे हे। खास करके रायपुर के स्वामी विवेकानंद एयरपोर्ट म बाहर लेइय्या-जइय्या यात्री मन के कड़क चेकिंग अउ स्वाब जांच करे के हुकूम दिये गे हे, ताकि ए बीमारी के खतरा ला समे रहत रोके जा सके।
स्वास्थ्य मंत्रालय के सूत्र मन के मुताबिक, अंतरराष्ट्रीय उड़ान मन या कनेक्टिंग फ्लाइट्स के रद्दा ले आवन-जावन करइय्या संदेही लच्छन वाले यात्री मन ऊपर कड़क नजर रखे जाही। एयरपोर्ट म डाक्टर अउ स्वास्थ्य करमी मन के एक ठो बिसिस टीम तैनात करे जावत हे, जो थर्मल स्क्रीनिंग के संग-संग जरूरत परे म यात्री मन के सैंपल (स्वाब) घलो लेही।
एकर संग च प्रदेश के जम्मो बड़े सरकारी अस्पताल अउ मेडिकल कॉलेज मन ला घलो अलर्ट म रहे बर कहे गे हे। कोनो भी आपातकालीन स्थिति ले निपटे बर अस्पताल मन म आइसोलेशन वार्ड तैयार रखे अउ जरूरी दंवाई मन के स्टॉक रखे के निरदेस जारी कर दिये गे हे। स्वास्थ्य विभाग ह आम जनता ले घलो अपील करे हे कि कोनो डरे के बात नई हे, बस सचेत रहव अउ कोनो भी किसम के संदेही लच्छन दिखे म तुरंतेच तीर-तखार के स्वास्थ्य केंद्र म जाके जानकारी दव।
