रायपुर के 6 बड़े कालोनी म पहुंचिस पाइपलाइन नेटवर्क, अब गैस सिराही त 2 मिनट म होही रिफिल

Gas Pipeline Raipur : रायपुर। एलपीजी गैस के किल्लत के बीच अब राजधानी म पाइप्ड नेचुरल गैस (पीएनजी) योजना ह तेजी पकड़ ले हे। ए पीएनजी सिस्टम म जदि गैस सिरा जाही त सिरिफ 2 मिनट के भीतर दोबारा सप्लाई सुरू हो जाही, काबर कि ए पूरा तकनीक ह मोबाइल अउ स्मार्ट प्री-पेड मीटर ले लैस हे। रायपुर के भनपुरी म बने डीएम टॉवर के बाद अब सहर के छह बड़ रिहायशी सोसायटिन म गैस पाइपलाइन पहुंच चुके हे अउ बहुत जल्दी एकर टेस्टिंग घलो करे जाही। ए योजना ह केंद्र सरकार के पेट्रोलियम एवं प्राकृतिक गैस विनियामक बोर्ड के गाइडलाइन अउ अभी-अभी लागू छत्तीसगढ़ शहरी गैस वितरण नीति 2026 के तहत आगे बढ़ाए जात हे।

कबीर हाइट्स म काम सुरू, दूसर जिला मन म घलो सउंपिस जिम्मा
राजधानी के अलावा प्रदेश के दूसर जिला मन म घलो अलग-अलग कंपनी मन ला गैस वितरण नेटवर्क बनाए के काम सउंपे गे हे। रायपुर म ‘हरियाणा सिटी गैस कंपनी’ ह पाइपलाइन बिछाए के काम करत हे। कबीर नगर म बने हाउसिंग बोर्ड के ‘कबीर हाइट्स मल्टीस्टोरी’ म पाइपलाइन बिछाए के काम जोरों-सोरो ले चलत हे। सरकार ह बछर 2030 तक 42 लाख घर मन म पाइपलाइन ले गैस पहुंचाए के लछ्य रखे हे, जेकर बर 1100 सीएनजी स्टेशन घलो खोले जाही।

रडार सिस्टम ले जमीन के भीतर के जांच
कंपनी के अधिकारी मन बताइन कि गैस पाइपलाइन बिछाए के पहिली ‘ग्राउंड पैनेट्रेटिंग रडार सिस्टम’ (GPR) के जरिया जमीन के भीतर पहिली ले गड़े पाइपलाइन, केबल अउ दूसर चीज मन के जांच करे जात हे। एकर बाद ‘होरिजेंटल डायमेंशनल ड्रिलिंग मशीन’ (HDD) ले 32 एमएम के एमडीपी पाइप बिछाए जात हे। मेन लाइन ले घर मन तक गैस पहुंचाए बर गैल्वेनाइज्ड आयरन पाइप (GI) के उपयोग करे जात हे, जेला सोझ रसोइघर तक जोड़े के बाद बीच म स्मार्ट प्री-पेड मीटर लगाए जाही। ए स्मार्ट मीटर म मोबाइल सिम लगे रही, जेमा रिचार्ज खतम होए के बाद जइसने रिचार्ज करहू, 2 मिनट के भीतर गैस सप्लाई फिर सुरू हो जाही।

अवैध कॉलोनी मन म नई मिलही कनेक्शन
नगर निगम ह साफ कहि दे हे कि अवैध कॉलोनी मन म ए कनेक्शन नई दिए जाय। कनेक्शन देय के पहिली कंपनी के टीम ह केवायसी (KYC) के जांच करही अउ जमीन-जगा के कागज मन ला देखही। सोसायटी म समिति के मंजूरी मिले के बादे ए काम सुरू करे जात हे। कंपनी के मुताबिक फाफाडीह, देवेंद्र नगर अउ शंकर नगर इलाका म एक हफ्ता के भीतर काम सुरू हो जाही।

एलपीजी ले 20 परसेंट पइसा के बचत के दावा
कंपनी के प्रोजेक्ट मैनेजर सुमन कुमार माजी ह बताइन कि पाइप्ड नेचुरल गैस (PNG), एलपीजी सिलेंडर के तुलना म लगभग 20 परसेंट तक ससता पड़ी। एकर संग उपभोगता मन ला सिलेंडर बुकिंग करे, डिलीवरी अउ वजन नापे जइसन झंझट मन ले घलो मुकती मिल जाही।

का होही पूरा खरचा अउ तरीका:
रजिस्ट्रेशन फीस: 590 रूपिया।

रिफंडेबल कॉशन मनी: 9000 रूपिया जमा करे बर पड़ी, जेमा रेग्युलेटर, मीटर अउ दूसर सामान लगाए जाही।

गैस के रेट: 49 रूपिया स्टैंडर्ड क्यूबिक मीटर के दर ले बिलिंग होही।

लछ्य: 2 बछर के भीतर 20 हजार घर मन म कनेक्शन देय के लछ्य हे।

वर्जन:
पेट्रोलियम एवं प्राकृतिक गैस विनियामक बोर्ड ले मंजूरी मिले के बाद कंपनी ह प्रदेश म काम सुरू कर दे हे। राज्य सरकार ह ‘छत्तीसगढ़ शहरी गैस वितरण नीति 2026’ घलो लागू कर दे हे, जेकर से सहर मन म गैस पाइपलाइन नेटवर्क ला बढ़ाए म मदद मिलही।
– डॉ. फरिहा सिद्दीकी, संचालक (खाद्य नागरिक आपूर्ति एवं उपभोक्ता संरक्षण, छत्तीसगढ़ शासन)

इहां-इहां पहुंच गे हे पाइपलाइन:
मारुति लाइफ स्टाइल

कबीर हाइट्स

इंपीरियल हाइट्स

हर्षित ज्वेल्स

बरसाना इनक्लेव

डीएम टॉवर