रायपुर मा आईपीएल के रउनक; आरसीबी के टीम पहुंचिस, विराट के स्वागत मा उमड़िस भीड़
रायपुर, छत्तीसगढ़: रायपुर मा 10 साल बाद फेर ले आईपीएल के धूम मचैया हे। शहीद वीर नारायण सिंह स्टेडियम मा होवइया ए मैच बर आरसीबी (RCB) के टीम आज रायपुर पहुंच गे हे। एयरपोर्ट मा विराट कोहली अउ ओकर संगी खिलाड़ी मन के जम्मों क्रिकेट प्रेमी मन ह जबरदस्त स्वागत करिन। सुरक्षा के कड़ा इंतजाम के बीच टीम ल सीधा मायरा रिसॉर्ट ले जाय गे हे।
10 मई के होही महामुकाबला इतवार यानी 10 मई के रॉयल चैलेंजर्स बेंगलुरु (RCB) अउ मुंबई इंडियंस (MI) के बीच घमासान मुकाबला होही। ए मैच ल देखे बर रोहित शर्मा अउ विराट कोहली के प्रशंसक मन मा भारी उत्साह हे। चर्चा हे कि अनुष्का शर्मा अउ रितिका सजदेह घलो अपन-अपन टीम ल सपोर्ट करे रायपुर आ सकत हें। संग मा अंबानी परिवार अउ बॉलीवुड के बड़े सितारा मन के घलो पहुंचे के उम्मीद हे।
सुरक्षा बर 1500 जवान तैनात मैच ल देखत पुलिस ह सुरक्षा के तगड़ा व्यवस्था करे हे। मुख्य सचिव विकासशील ह हाईलेवल मीटिंग लेके अधिकारी मन ल निर्देश दे हें। सुरक्षा के कमान डीआईजी गिरजाशंकर जायसवाल संभालही। करीब 1500 पुलिस जवान अउ 8 आईपीएस अफसर तैनात रहिहीं। ट्रैफिक व्यवस्था ल सुधारे बर 300 ले जादा जवान अलग ले ड्यूटी मा लगाय गे हें।
स्टेडियम पहुंचे बर रूट अउ पार्किंग स्टेडियम जाय बर 5 रस्ता तय करे गे हे। रायपुर, बिलासपुर, भिलाई अउ महासमुंद ले आवइया मन बर अलग-अलग पार्किंग जैसे साई अस्पताल, सेंध तालाब अउ परसदा मा व्यवस्था करे गे हे। वीआईपी रूट अलग ले आरक्षित रखे गे हे ताकि ककरो ल घलो परेशानी झन होवय।
