ऑपरेशन सिंदूर के पहिली वर्षगांठ; सीएम साय ह वीर जवान मन ल करिन नमन, कहिन- नवा भारत अब आतंकवाद ल बर्दाश्त नइ करय

Operation Sindoor : रायपुर। मुख्यमंत्री विष्णुदेव साय ह “ऑपरेशन सिंदूर” के पहिली वर्षगांठ म भारतीय सेना के सौरय, पराक्रम अउ अदम्य साहस ल नमन करिन। ओमन कहिन कि ये अभियान ह सिरिफ एक सैन्य कार्रवाई नइ हे, बल्कि नवा भारत के अटूट इच्छाशक्ति, निर्भीक संकल्प अउ निर्णायक शक्ति के प्रतीक आय।

मुख्यमंत्री ह सोशल मीडिया हैंडल ‘एक्स’ म पोस्ट कर के कहिन कि आज ले एक साल पहिली पहलगाम म सीमा पार ले आतंकी मन ह जे घिनौना हमला करे राहिन, ओ ह पूरा देस ल झकझोर दे राहिस। फेर भारत ह ओ चुनौती के अइसन जवाब दीस, जे ह इतिहास म सौरय अउ संकल्प के सुग्घर अध्याय जोड़ दीस।

मुख्यमंत्री साय ह कहिन कि “ऑपरेशन सिंदूर” ह दुनिया ल साफ संदेश दे हे कि नवा भारत अब आतंकवाद ल कतको स्थिति म बर्दाश्त नइ करय। ओमन कहिन कि अब भारत ह चुपचाप सहे वाला देस नइ रह गे हे, बल्कि मातृभूमि कोती उठइया हर कोनो बुरी नजर के कड़ा जवाब दे म सक्षम हे।

मुख्यमंत्री ह आगू कहिन कि ये अभियान ह भारतीय जवान मन के अदम्य साहस, बेजोड़ रणनीति अउ देस बर असीम समर्पण ल अमर कर दीस। आतंकी मन अउ ओखर आका मन ल जइसन करारा जवाब दे गे हे, ओ ह दुनिया भर म भारत के सैन्य शक्ति अउ मजबूत नेतृत्व के नवा पहचान बनाय हे।

मुख्यमंत्री विष्णुदेव साय ह कहिन कि प्रधानमंत्री नरेंद्र मोदी के नेतृत्व म भारत ह आतंकवाद के खिलाफ “शून्य सहिष्णुता” के नीति ल सिरिफ गोठ तक सीमित नइ रखिन, बल्कि ओला जमीन म घलो उतारिन। भारतीय सेना के ताकत अउ आधुनिक तकनीक ह ये साबित कर दीस कि भारत अब सिरिफ प्रतिक्रिया नइ देय, बल्कि जरूरत पड़े म दुश्मन ल घर म घुस के मारथे।

मुख्यमंत्री साय ह “ऑपरेशन सिंदूर” के पहिली वर्षगांठ म देस के ओ सब्बो वीर जवान मन ल कोटि-कोटि नमन करिन, जेखर पराक्रम ले हर भारतीय के माथा ह गरब ले ऊंचा हो गे हे। ओमन पहलगाम हमला म जान गंवाय वाला पर्यटक मन ल घलो श्रद्धांजलि दीन।