12वीं पेपर लीक मामला: फरार आरोपी ऊपर ईनाम के घोषणा, पता बताइया ल मिलही अतका रुपिया
CG Board Paper Leak : रायपुर। छत्तीसगढ़ बोर्ड के 12वीं कक्षा के हिंदी पेपर लीक मामला म पुलिस ह फरार आरोपी ऊपर ईनाम के घोषणा कर दे हे। आरोपी ह 14 मार्च ले फरार हे अउ ओकर खोजबीन जारी हे। ए बीच, डिप्टी कमिश्नरेट ऑफ पुलिस ह आज फरार आरोपी ऊपर 5,000 रुपिया के ईनाम रखे के ऐलान करे हे।
बता दन कि पहिली जारी होय टाइम टेबल के मुताबिक 14 मार्च के 12वीं के हिंदी के परीक्षा होय रहीस, लेकिन पेपर लीक के सेती 23 मार्च के एला रद्द कर के नवा तारीख जारी करे गीस। एखर बाद 10 अप्रैल के दोबारा परीक्षा लीस। सेंट्रल जोन के डिप्टी कमिश्नरेट ऑफ पुलिस उमेश गुप्ता ह फरार आरोपी वेणु जंघेल के सुध देइया या ओला धरावाइया ल नगद पुरस्कार दे के गोठ कहे हे। आदेश म कहे गे हे कि आरोपी ह गिरफ्तारी ले बचे बर लुकाय हे, अउ ओखर अइसने घूमना समाज बर खतरा हो सकत हे। जेकर सेती ओला धराय म मदद करइया ल 5 हजार रुपिया के नगद ईनाम दियाही।
ये मामला तब आगू आइस जब NSUI ह सोशल मीडिया अउ व्हाट्सऐप ग्रुप म परीक्षा ले पहिली सवाल वायरल होय के दावा करीस। मामला के गंभीरता ल देखत हुए माध्यमिक शिक्षा मंडल ह सिटी कोतवाली थाना म FIR दर्ज कराय रहीस, जेखर बाद साइबर सेल ह जांच शुरू कर दीस। एखर विरोध म छात्र संगठन NSUI ह छत्तीसगढ़ माध्यमिक शिक्षा मंडल (CGBSE) के घेराव घलो करे रहीस अउ दोषी मन ऊपर कड़ी कार्रवाई के मांग करे रहीस।
