सरकारी रेस्टहाउस बन गे ‘दारू अड्डा’! वीआईपी कमरा म शराब पार्टी करत धराइन अधिकारी, मंत्री ह दीस कड़ा करवाई के निर्देश

Chhattisgarh News : कटघोरा। कोरबा जिला ले सरकारी रेस्टहाउस के गलत इस्तमाल के एक बड़का मामला आगू आए हे। डीएसपीएम (DSPM) के चीफ केमिस्ट गोवर्धन सिदार अउ चार दूसर अधिकारी मन वीआईपी रेस्टहाउस म शराब पीवत धराइन हें। ए बात के जानकारी मिलत ले मंत्री लखन लाल देवांगन ह सबो अधिकारी मन ऊपर कड़ी काररवाई करे के निर्देश दे दे हें।

बताय जावत हे कि बी-टाइप वीआईपी रेस्टहाउस के एक कमरा म शराब के खाली बोतल, चखना अउ पानी के पाउच बिखरे रिहिस। ओखरे संग रेस्टहाउस के किचन म रखे फ्रीजर म घलो बियर के बोतल मन रखे रिहिस।

जानकारी के मुताबिक, पूर्व नेता प्रतिपक्ष धरम लाल कौशिक कोरबा प्रवास म रिहिन। ओ मन ले मिले बर उद्योग मंत्री लखन लाल देवांगन, महापौर संजू देवी राजपूत अउ जिला भाजपा अध्यक्ष गोपाल मोदी रेस्टहाउस पहुंचे रिहिन। ओही बखत स्थानीय कार्यकर्ता मन ह मंत्री ला सूचना दीस कि वीआईपी कमरा म कुछ अधिकारी मन शराब के महफिल जमा के बैठे हें।

खबर मिलते साथ मंत्री ह मामला के गंभीरता ला देखत तुरंत उत्पादन कंपनी के एमडी एस.के. कटियार ला फोन करिस अउ संबधित अधिकारी मन के खिलाफ कड़ी काररवाई करे बर कहिस।

देखइय्या मन के कहना हे कि कमरा म सिगरेट के धुआं भरे रिहिस अउ अधिकारी मन नियम-कानून ला छींक म रख के नसा म चूर रिहिन। अब देखे के बात होही कि ए अधिकारी मन ऊपर का काररवाई होथे।