अक्षय तृतीया में सोना खरीदे बर मिलत हे बंपर ऑफर….कैशबैक मेकिंग चार्ज में छूट के भरमार
Akshaya Tritiya Gold Offers : अक्षय तृतीया 2026 के मउका में देशभर के बड़े ज्वेलरी कंपनी मन ह गाहक मन ला रिझाय बर कतकोन किसम के बढ़िया ऑफर निकारे हें। 19 अप्रैल के मनाय जाय वाली ए सुभ दिन में सोना खरीदना परंपरा ले ही बहुत सुभ माने जाथे, एही सेती हर बछर ए दिन सोना के मांग ह हबक के बढ़ जाथे। ए बार घलो कंपनी मन प्री-बुकिंग, कैशबैक अउ गोल्ड रेट प्रोटेक्शन जइसन स्कीम के जरिए गाहक मन ला बढ़िया डील दे के कोसिस करत हें।
गोल्ड रेट लॉक स्कीम बनिस सबले बड़े आकर्षण
ए बार सबले जादा चर्चा गोल्ड रेट लॉक अउ प्रोटेक्शन स्कीम के हे। तनिष्क, जोयलुक्कास, मालाबार गोल्ड अउ कृष्णा डायमंड जइसन ब्रांड मन गाहक मन ला पहिली ले सोना के रेट तय करे के विकल्प देवत हें। एखर फायदा ए हे कि अगर बाद में सोना के कीमत बढ़थे, त गाहक ह पुराना कम रेट में ही सोना खरीद सकही। अउ अगर रेट ह कम होगे, त ओला नवा कम रेट के फायदा मिलही।
मेकिंग चार्ज अउ डायमंड ज्वेलरी में भारी छूट
गाहक मन ला लुभाय बर कतकोन कंपनी मन ह मेकिंग चार्ज (घड़ाई) में छूट दे हें। खास करके मालाबार गोल्ड ह गोल्ड अउ स्टडेड ज्वेलरी ऊपर 30% तक के छूट देवत हे। एखर संग ही डायमंड ज्वेलरी ऊपर घलो खास ऑफर मिलत हे, हालांकि ए ऑफर ह कुछु समय बर अउ चुनिंदा सामान मन ऊपर ही लागू रही।
कैशबैक अउ गिफ्ट वाउचर ले बढ़िस फायदा
जोयलुक्कास जइसन ब्रांड ह गाहक मन ला कैशबैक अउ गिफ्ट वाउचर घलो ऑफर करत हें। खरीदारी के हिसाब ले मिले वाला ए वाउचर ह आगू के खरीदी ला सस्ता बनाय में मदद करही। ए ऑफर ह सोना, हीरा अउ चांदी जइसन जम्मो ज्वेलरी ऊपर लागू हे।
थोरिक एडवांस देके प्री-बुकिंग के सुविधा
कंपनी मन ह गाहक मन ला असान प्री-बुकिंग के घलो रस्ता बताय हें। अब सिरिफ 10% ले 25% तक एडवांस देके ज्वेलरी बुक करे जा सकत हे। एखर ले गाहक मन अभी कम पइसा देके अपन खरीदी पक्का कर सकत हें अउ बाकी के पइसा ला बाद में दे सकत हें।
ज्वेलरी कारोबार ले जुड़े मनखे मन के कहना हे कि अक्षय तृतीया ह साल भर के कुल कारोबार के 15-18% हिस्सा रखथे। ए साल घलो ए बढ़िया ऑफर मन के सेती बाजार में सोना के मांग बढ़े के पूरा भरोसा हे।
