जनगणना 2027 : छत्तीसगढ़ म एक मई ले सुरु होही पहिली चरन, मकान मन के होही गिनती
रायपुर। भारत सरकार कोति ले होवइया जनगणना 2027 के तहत पहिली चरन म मकान मन के सूची बनाय अऊ मकान मन के गिनती (House Listing & Housing Census) के काम छत्तीसगढ़ म 01 मई ले 30 मई 2026 तक, यानी 30 दिन के भीतर करे जाही। ये चरन जनगणना बर बहुते जरूरी आय, जेकर ले हर रहइया अऊ बिना-रहइया भवन, मकान के हालत, ओकर उपयोग अऊ मिलेवइया सुबिधा मन के बारे म पूरा जानकारी जुटाया जाही।
डिजिटल इंडिया के तहत ये बार मनखे मन के सुबिधा बर स्व-गणना (Self-Enumeration) के विकल्प घलो दे गे हे। जे मनखे मन चाहथें, ओ मन 16 अप्रैल 2026 ले 30 अप्रैल 2026 के बीच ऑनलाइन पोर्टल म जाके अपन परिवार अऊ मकान के जानकारी खुद भर सकथें। स्व-गणना करइया परिवार मन ला एक ठन स्व-गणना आईडी (Self-Enumeration ID) दे जाही, जेला सम्हाल के रखना होही अऊ जब प्रगणक (गिनती करइया कर्मचारी) घर आही, त ओला बताना होही। आपके भरे जानकारी ला चेक करे के बाद प्रगणक ओला सबमिट कर दीही।
ये जानकारी देस के सामाजिक-आर्थिक योजना, सहर अऊ गांव के विकास, आवास योजना, पानी अऊ सफाई के कार्यक्रम बर बहुते काम आही। प्रगणक मन अपन पहचान पत्र के साथ आपके घर आहीं। नागरिक मन ले बिनती हे कि ओ मन प्रगणक ला सही-सही जानकारी देवें। जनगणना म मिले सब्बो जानकारी ला गोपनीय (गुप्त) रखे जाही, एकर उपयोग सिरिफ सरकारी नीति अऊ योजना बनाय बर करे जाही।
निगरानी बर जिला, राज्य अऊ राष्ट्रीय स्तर म कंट्रोल रूम घलो बनाय जाही। जनगणना कार्य निदेशालय छत्तीसगढ़ के निदेशक ह सबो मनखे मन ले ये राष्ट्रीय काम म बढ़-चढ़ के हिस्सा लेय के अपील करे हें।
