हनुमान चालीसा अउ बिहाव के गोहार: छत्तीसगढ़ बोर्ड के कॉपी म लइका मन के अजब-गजब कारनामा
CGBSE Result 2026 : रायपुर। छत्तीसगढ़ बोर्ड के 10वीं अउ 12वीं के परीक्षा के कॉपी मन जँच गे हावय। अब सबो लइका मन ला रिजल्ट के इंतजार हे, फेर कॉपी जाँचइया गुरुजी मन ह अइसन-अइसन बात बतावत हें जेला सुन के आप मन घलो दंग रह जाहू। लइका मन ह सवाल के जवाब लिखे के जगह पास होय बर अजब-गजब अपील अउ इमोशनल मैसेज लिख डरे हें।
हनुमान चालीसा अउ कन्यादान के आशीर्वाद: कॉपी जाँचत समय एक ठन कॉपी अइसन मिलिस जेमा लइका ह पूरा ‘हनुमान चालीसा’ लिख दीस हावय। ओ ह नीचे लिखिस— “सर, अगर आप मन हनुमान जी के भक्त होहू, त मोला पास कर दिहू।”
ओशनेच, एक झन लइकी ह अपन गरीबी अउ बिहाव के वास्ता दे हावय। ओ ह लिखिस— “सर, गरीब बेटी के बिहाव तय हो गे हे, 33 नंबर दे के कन्या ला आशीर्वाद देव।” एक अउ लइकी ह लिखिस कि अगर ओ ह फेल हो जाही त ओकर बिहाव टूट जाही। कोनो ह नीट (NEET) के तैयारी के बहाना बनाइस त कोनो ह घर के तंगी के रोना रोइस।
2.66 लाख कॉपी के जाँच पूरा: जानकारी के मुताबिक, हाईस्कूल अउ हायर सेकेंडरी के कुल 2,66,173 उत्तर पुस्तिका मन के मूल्यांकन पूरा हो गे हावय। गुरुजी मन के कहना हे कि पिछला साल के तुलना म ए बार अइसन लिखे वाले लइका मन के संख्या कम हे, फेर जउन मन घलो लिखे हें, ओ मन गुरुजी मन ला सोच म डार दीं।
लइकी मन के संख्या हावय जादा: ए साल परीक्षा म 5.69 लाख ले जादा लइका मन सामिल होय रहिन। खास बात ये हावय कि 10वीं अउ 12वीं, दूनों कक्षा म लइकी मन के संख्या लइका मन ले जादा हावय। 10वीं म 3 लाख 23 हजार अउ 12वीं म 2 लाख 46 हजार ले जादा परीक्षार्थी रहिन। अब देखना ये हे कि हनुमान चालीसा अउ बिहाव के ये गोहार लइका मन ला पास करवा पाथे या नई।
