आयुष्मान योजना मा बड़े कार्रवाई: नियम नई मानइया 59 अस्पताल मन ऊपर गिरीस गाज, 33 सस्पेंड अउ 26 के भुगतान रुकिस
CG Ayushman Yojana Big Action : रायपुर. छत्तीसगढ़ मा आयुष्मान भारत प्रधानमंत्री जन आरोग्य योजना (AB-PMJAY) ला लेके राज्य सरकार ह एक बड़ कदम उठाए हे। राष्ट्रीय स्वास्थ्य प्राधिकरण (NHA) के नियम मन के अनदेखी करे अउ पोर्टल मा जानकारी अपडेट नई करे के सेती 59 अस्पताल मन ऊपर कड़ा कार्रवाई करे गे हे। एमा ले 33 अस्पताल मन ला योजना ले सस्पेंड कर दे गे हे, जबकि 26 अस्पताल मन के भुगतान (पेमेंट) ला रोक दे गे हे।
काबर होइस ये कार्रवाई?
नियम के मुताबिक, जतका भी अस्पताल आयुष्मान योजना मा जुड़े हें, ओ मन ला ‘हॉस्पिटल एम्पैनलमेंट मॉड्यूल’ (HEM 2.0) पोर्टल मा अपन जरूरी दस्तावेज अउ जानकारी 31 दिसंबर 2025 तक अपलोड करना रहीस। विभाग कोति ले कई बार चिट्ठी लिखे के बाद भी ये अस्पताल मन ह जानकारी अपडेट नई करिन, जेखर बाद राज्य नोडल एजेंसी ह ये सख्त फैसला लीस।
तीन तरीका ले करे गे हे कार्रवाई:
1. एको बार अर्जी नई देवइया 21 अस्पताल सस्पेंड: जेन अस्पताल मन ह पोर्टल मा एको बार अपन जानकारी नई भरिन, ओ मन ला तुरंत सस्पेंड कर दे गे हे। एमा रायपुर के जौहरी, महादेव, न्यू रायपुरा, शिवम, जैन अउ दुर्ग के ए पी सर्जिकल, आईएमआई जइसन अस्पताल शामिल हें।
2. अधूरी जानकारी देवइया 12 अस्पताल मन ऊपर गाज: पोर्टल मा पूरा जानकारी नई भरे अउ विभाग के पूछे गे बात मन के जवाब नई देवइया 12 अस्पताल मन ला भी सस्पेंड करे गे हे। एमा रायपुर के काल्दा नर्सिंग होम, प्रज्ञा अस्पताल अउ महासमुंद के श्री उत्तम साई केयर के नाम शामिल हे।
3. 26 अस्पताल मन के पेमेंट अउ प्री-ऑथ रोकिन: जेन अस्पताल मन के कागज मन मा कमी पाइन, ओ मन के पेमेंट अउ नवा मरीज मन के इलाज बर मिले वाला अनुमति (प्री-ऑथ) ला रोक दे गे हे। एमा बालोद के शकुंतला अस्पताल, दुर्ग के सुविधा अउ रायपुर के एकता इंस्टीट्यूट अउ रावतपुरा सरकार जइसन बड़े अस्पताल हें।
भिलाई के सेक्टर-7 मा पीलिया के कहर
दुसरी कोति, भिलाई के सेक्टर-7 इलाका ले एक चिंताजनक खबर आवत हे। जिहाँ पिछला दू दिन ले नन मा गंदा पानी आए के सेती पीलिया फैल गे हे। एखर ले 35 ले जादा लइका मन बीमार हो गे हें। मोहल्ला वाले मन प्रशासन ले भारी नाराज हें।
