भिलाई स्टील प्लांट में बड़का हादसा; टर्बाइन फटे ले मचीस हड़कंप, केबल ले लटक के मजदूर मन बचाइन जान
Bhilai Steel Plant blast news today : भिलाई : भिलाई ले बड़े खबर आवत है, जहाँ भिलाई स्टील प्लांट (BSP) के टर्बाइन में आज अचानक ब्लास्ट हो गे, जेखर बाद पूरा प्लांट में हड़कंप मच गे। ए बड़े हादसा में 8 मजदूर मन घायल होय हें, जे मन ल इलाज बर अस्पताल में भर्ती कराए गे है।
भिलाई। स्टील अथॉरिटी ऑफ इंडिया लिमिटेड (सेल) के भिलाई स्टील प्लांट में आज टर्बाइन फटे ले आग लग गे। प्रत्यक्षदर्शी मन के कहना है कि धमाका अतका तेज रहिस कि कर्मचारी मन डरा गे रहिन। आग अतका तेजी ले फैलिस कि मजदूर मन ल निकले के रस्ता नई मिलत रहिस, जेखर बाद मनखे मन पाछू के रस्ता ले कोनो तरह बाहर निकलिन। ए घटना में 2 नियमित कर्मचारी अउ 8 ठेका मजदूर आग के घेरा में फंस गे रहिन।
केबल के सहारा ले बचाइन जान जब आग चारों मुड़ा फैल गे अउ धुँआ के सेती रस्ता नई दिखिस, तब मजदूर मन छत डाहर भागिन। रस्ता बंद देख के कर्मचारी मन बहादुरी देखाइन अउ केबल ल खिड़की में बांध के ओखर सहारा ले बारी-बारी नीचे टीन शेड में उतरिन। ए दौरान केबल ले हाथ रगड़ाय के सेती कई झन घायल हो गे हें, त कोनो के पैर फ्रैक्चर हो गे है।
अस्पताल में चलत है इलाज हादसा के जानकारी मिलत ही फायर ब्रिगेड के आधा दर्जन ले जादा गाड़ी मन मौका में पहुँच के आग बुझाइन। घायल मजदूर मन ल प्राथमिक उपचार के बाद सेक्टर-9 अस्पताल रेफर करे गे है। घायल मन में कीर्ति कुमार भगत, महेंद्र कुशवाहा, महेंद्र जायसवाल, वैभव, ओमेंद्र कुमार तिस्दा, सुशांत, मनीष, अवधेश अउ शिव मोहन त्रिपाठी शामिल हें। बीएसपी के उच्च अधिकारी मन घलो मौका में पहुँच के स्थिति के जायजा लेवत हें।
