सर्वाइकल कैंसर के खिलाफ महाअभियान: 14 साल के लइका मन ल लगही मुफ्त टीका
गौरेला-पेंड्रा-मरवाही। जिला के 14 ले 15 बछर के नोनी मन बर कैंसर ले बचाव के एक बड़े अऊ राहत भरी खबर आगू आई हे। केंद्र सरकार के एक बड़े मुहिम के तहत अब हमर जिला मा घलो 14 ले 15 साल के बीच के लइका मन ल सर्वाइकल कैंसर ले बचाए बर मुफ्त मा एचपीवी (HPV) वैक्सीन लगाए जात हे।
मुख्य चिकित्सा अऊ स्वास्थ्य अधिकारी (CMHO) डॉ. रामेश्वर शर्मा ह एखर बारे मा जादा जानकारी देवत बताइन कि सर्वाइकल कैंसर माई लोगन मन मा गर्भाशय के निचला हिस्सा यानी गर्भाशय ग्रीवा (Cervix) मा होय वाला कैंसर आय। ये मुख्य रूप ले ह्यूमन पैपिलोमावायरस (HPV) के संक्रमण के सेती होथे। भारत मा माई लोगन मन के बीच ये दूसरा सबले जादा अऊ जानलेवा गंभीर किस्म के कैंसर आय, जेकर ले पूरा देश मा हर साल हजारों झन मनखे मन के इलाज के कमी मा मौत हो जाथे।
CMHO डॉ. शर्मा के मुताबिक, 14 साल के नोनी मन बर एचपीवी वैक्सीन सबले बढ़िया सुरक्षा कवच आय। ये टीका आघू चल के कैंसर के खतरा ल 93 ले 100% तक कम कर सकथे। सयानी माई लोगन मन बर ‘पैप स्मीयर’ (Pap smear) अऊ ‘एचपीवी टेस्ट’ जैसन जांच जरूरी हे, ताकि बीमारी के सुरुवाती लच्छन के पता चल सके। साफ-सफाई अऊ सुरक्षित जीवनशैली अपना के घलो एखर खतरा ल कम करे जा सकथे।
डॉ. रामेश्वर शर्मा ह जिला के जम्मो दाई-दादा मन ले अपील करिन हे कि ओ मन अपन 14 साल के बेटी मन ल जिला अस्पताल गौरेला-पेण्ड्रा-मरवाही मा ले जाके निशुल्क टीका जरूर लगवाएं। ताकि हर नोनी ल सर्वाइकल कैंसर ले सुरक्षा के ढाल मिल सके।
