सिबिल स्कोर अउ लोन ला लेके RBI के 4 बड़े बदलाव, जानव आप मन ला कइसन होही फायदा

RBI New Rules 2026 : नवा वित्तीय वर्ष के शुरुआत के संग 1 अप्रैल 2026 ले बैंकिंग अउ पर्सनल फाइनेंस के दुनिया में बड़े बदलाव होय बर जावत हे। भारतीय रिजर्व बैंक (RBI) ह ग्राहक मन ला बड़ राहत देवत हुए लोन, क्रेडिट स्कोर अउ नॉमिनी ले जुड़े नियम मन ला ढील दे हे। ए बदलाव मन के सीधा असर आपके ईएमआई (EMI) अउ सिबिल स्कोर (CIBIL Score) ऊपर परही।

1. अब महीना भर के अगोरा खत्म, हर हफ्ता अपडेट होही सिबिल स्कोर
क्रेडिट स्कोर सुधारे के कोसिस करत मनखे मन बर अब नीक खबर हे। पहिले सिबिल स्कोर अपडेट होय में एक महीना के समय लागत रहीस, फेर 1 अप्रैल ले ए प्रक्रिया हर 7 दिन में पूरा करे जाही। महीना के 7, 14, 21 अउ 28 तारीख के आपके क्रेडिट प्रोफाइल अपडेट होही। एखर मतलब ये हे कि अगर आप मन अपन उधारी चुका दे हव, त आपके स्कोर सिरिफ एक हफ्ता में सुधर जाही अउ आप मन ला नवा लोन मिले में आसानी होही।

2. लोन ला समय ले पहिले बंद करे बर नई लगे ‘जुर्माना’
अगर आपके पास ज्यादा पैसा आ गे हे अउ आप मन अपन होम लोन, कार लोन या पर्सनल लोन ला समय ले पहिले बंद (Foreclosure) करना चाहथव, त अब आप मन ला कोनो अउ ज्यादा पैसा नई दे बर परही। फ्लोटिंग ब्याज दर ऊपर ले गे जम्मों रिटेल लोन ऊपर अब प्रीपेमेंट या फोरक्लोजर चार्ज ला पूरी तरह खत्म कर दे गे हे। एखर से ग्राहक मन के हजारों रूपिया बाचही।

3. एक बैंक खाता में जोड़ सकहू 4 नॉमिनी
भविष्य के सुरक्षा अउ कानूनी लड़ाई-झगड़ा ला कम करे बर आरबीआई ह नॉमिनेशन नियम में बड़े बदलाव करे हे। अब ग्राहक मन अपन बैंक सेविंग अकाउंट अउ लॉकर में ज्यादा ले ज्यादा 4 नॉमिनी (वारिस) के नाम जोड़ सकहीं। पहिले ए सीमा कम रहीस। ए कदम ले कोनो अनहोनी होय के स्थिति में परिवार के मनखे मन ला पैसा निकाले या संपत्ति के देखरेख करे बर जादा भटके बर नई परय।

4. जेवर व्यापारी अउ गोल्ड लोन में राहत
आम जनता के संग-संग व्यापारी मन बर घलो राहत के खबर हे। जेवर (Jewelry) कारोबार ले जुड़े मनखे मन बर ‘गोल्ड मेटल लोन’ चुकाय के समय ला 180 दिन ले बढ़ा के 270 दिन कर दे गे हे। पैसा पटाय बर जादा 90 दिन मिले ले बाजार में नगद के लेनदेन (Cash Flow) अउ बने होही अउ छोटे ज्वेलर्स मन ला अपन धंधा बढ़ाय में मदद मिलही।