बैंकिंग में बड़ बदलाव: अब कागज के चेक नई, ‘ई-चेक’ ले होही भुगतान

RBI Payments Vision 2028 : मुंबई। भारतीय रिजर्व बैंक (RBI) ह देश में डिजिटल लेनदेन के भविष्य ला लेके अपन मास्टर प्लान ‘पेमेंट्स विजन 2028’ जारी कर दे हे। 27 मार्च 2026 के पेश करे गे ए रोडमैप के सीधा असर आम आदमी के जेब अउ बैंकिंग के जुन्ना तरीका मन ऊपर परही। ए नवा योजना के मुख्य लक्ष्य ऑनलाइन भुगतान ला न केवल तेज बनाना हे, बल्कि एला धोखाधड़ी (Fraud) ले घलो पूरी तरह सुरक्षित करना हे।

ई-चेक: जुन्ना चेक के जगह लेही डिजिटल अवतार
RBI अब पारंपरिक कागज वाले चेक बुक ला धीरे-धीरे चलन ले बाहर करे के तैयारी में हे। ओखर जगह अब ‘ई-चेक’ (Electronic Cheques) लाय जाही। ए डिजिटल चेक के जइसन काम करही, जेमा सुरक्षा के कड़ा पहरा रही। एखर से चेक क्लियर होय में जेवन कई दिन के समय लागत रहीस, ओ ह अब कुछे मिनट या घंटा में हो जाही। संग में फर्जी दस्तखत अउ चेक बाउंस जइसन मामला मन ऊपर घलो लगाम लगही।

UPI अउ नेट बैंकिंग ला कर सकहू ‘ऑन-ऑफ’
सुरक्षा ला अउ मजबूत बनावत हुए RBI अब ग्राहक मन ला ‘पेमेंट ऑन-ऑफ’ के सुविधा दे बर जावत हे। जिस तरह आप मन अपन एटीएम कार्ड ला मोबाइल ऐप ले बंद या चालू कर सकथव, ठीक वइसने अब आप मन अपन UPI अउ नेट बैंकिंग ला घलो कंट्रोल कर सकहू। जब आप मन ला पैसा के लेनदेन नई करना रही, त आप मन एला बंद कर सकथव, जेखर से कोनो घलो ठग आपके खाता में सेंध नई मार सकय।

फ्रॉड होइस त बैंक मन के घलो होही जिम्मेदारी
अभी तक डिजिटल फ्रॉड होय ले ग्राहक मन ला ही अपन बेगुनाही साबित करे बर भटके बर परत रहीस, फेर अब ‘शेयर्ड लायबिलिटी फ्रेमवर्क’ के तहत जिम्मेदारी तय करे जाही। अगर आपके साथ कोनो धोखाधड़ी होथे, त ओखर बर आपके बैंक अउ जेखर खाता में पैसा गे हे, वो दूनों बैंक ह जिम्मेदार होहीं। एखर से डूबे हुए पैसा के रिकवरी अब पहिली ले अउ ज्यादा आसान अउ तेज हो जाही।

सिम पोर्ट जइसन बदल सकहू अपन बैंक
RBI एक अउ नवा सुविधा ‘पेमेंट्स स्विचिंग सर्विस’ लाय बर जावत हे। एखर तहत अगर आप मन अपन बैंक के सर्विस ले खुश नई हव, त अपन बैंक ला बदलना मोबाइल सिम पोर्ट कराए जइसन आसान हो जाही। संग में, विदेश में पैसा भेजना अब न केवल सस्ता होही बल्कि आधार ले होय वाला पेमेंट (AePS) ला घलो पहिली ले अउ ज्यादा सुरक्षित बनाय जाही।