आईपीएल 2026 मा चेन्नई सुपर किंग्स ला तगड़ा झटका: शुरुआती मैच मन ले बाहिर होइन एमएस धोनी
चेन्नई। आईपीएल 2026 के सुरु होय के साथे च क्रिकेट प्रेमी मन अउ खास करके चेन्नई सुपर किंग्स (CSK) के प्रशंसक मन बर एक ठन बड़े अउ दुखद खबर आगू आय हे। टीम के पूर्व कप्तान अउ दिग्गज विकेटकीपर बल्लेबाज महेंद्र सिंह धोनी चोट के सेती टूर्नामेंट के शुरुआती कुछ मैच मन मा नई खेल पाही। शनिवार के मंझनिया कुन फ्रेंचाइजी कोति ले जारी आधिकारिक बयान ह करोड़ों फैंस के चिंता ला बढ़ा दे हे।
पिंडली मा खिंचाव बनीस रुकावट
चेन्नई सुपर किंग्स ह सोशल मीडिया मा जानकारी देवत बताइस कि एमएस धोनी अभी ‘काफ स्ट्रेन’ (पिंडली मा खिंचाव) के समस्या ले जूझत हे। अभी ओ मन रिहैबिलिटेशन (इलाज अउ आराम) के प्रक्रिया ले गुजरत हें अउ डॉक्टर मन ह ओ मन ला आगू के दो हफ्ता तक मैदान ले दूर रहे के सलाह दीन हें। फ्रेंचाइजी ह अपन पोस्ट मा लिखिस, “धोनी अभी रिकवरी मोड मा हें अउ उम्मीद हे कि ओ मन दो हफ्ता के भीतर फिट होके वापसी करही। गेट वेल सून थाला।”
ए बड़े मैच मन मा नई दिखही ‘थाला’
धोनी के अनुपस्थिति सीएसके बर एक बड़े चुनौती साबित हो सकत हे। जदि ओ मन पूरा 14 दिन तक बाहिर रहिथें, त ओ मन कम से कम तीन बड़े मैच के हिस्सा नई बन पाही:
-
30 मार्च: राजस्थान रॉयल्स के खिलाफ (गुवाहाटी)।
-
03 अप्रैल: पंजाब किंग्स के खिलाफ (चेन्नई)।
-
05 अप्रैल: रॉयल चैलेंजर्स बेंगलुरु (RCB) के खिलाफ बड़े मुकाबला।
क्रिकेट के जानकार मन के मानना हे कि धोनी के वापसी 11 अप्रैल ला दिल्ली कैपिटल्स के खिलाफ होय वाले मैच मा हो सकत हे। आरसीबी के खिलाफ होय वाले मैच मा धोनी के नई होना फैंस बर सबले बड़े झटका हे, काबर कि ए मैच के अगोरा पूरा दुनिया ला रहिथे।
फिटनेस ले लगातार जूझत हें धोनी
पिछले कुछ सीजन ले 44 साल के महेंद्र सिंह धोनी अपन फिटनेस ला लेके संघर्ष करत हें। 2024 के सीजन के बाद ओ मन अपन घुटना के सर्जरी घलो कराए रिहिन। धोनी ह खुद कतको बार कहिन हे कि बढ़त उमर के साथे साल के 10 महीना खुद ला फिट रखना ओ मन बर सबले कठिन काम होवत जावत हे। हालांकि, धोनी के जगह विकेटकीपिंग के जिम्मेदारी कउन संभालही, एला लेके टीम ह अभी कोई घोषणा नई करे हे।
अब सबो प्रशंसक बस एही दुआ करत हें कि ओ मन के पसंदीदा खिलाड़ी ‘थाला’ झटकुन फिट होके पीला जर्सी मा मैदान मा वापसी करंय।
