चिटफंड कंपनी के निवेशक मन बर खुसखबरी: प्रशासन ह तइयार करिस लिस्ट, जल्द मिलही पइसा
Chitfund Scam Chhattisgarh : दुर्ग। जिला प्रशासन ह चिटफंड कंपनी ‘यश ड्रीम’ के झांसा मा आय ढाई हजार निवेशक मन के पइसा लौटाए के तैयारी सुरु कर दे हे। प्रशासन कोति ले निवेशक मन के सूची तइयार कर लिए गे हे अउ अब ओ मन के दस्तावेज मन के जांच करे जावत हे। हालांकि, अभी ये तय नई होय हे कि कतका राशि बांटे जाही।
बता दन कि पहिली किश्त मा साढ़े चार हजार निवेशक मन ला लगभग 7 करोड़ रुपिया बांटे गे रिहिस, जेकर बर ओ मन ला ढाई साल तक अगोरा करना पड़िस। यश ड्रीम कंपनी मा कुल 14 हजार निवेशक मन के पइसा फंसे हे, जेमन ला अब अपन गाढ़ा पसीना के कमाई वापस मिले के आस जगे हे। कंपनी के संपत्ति ला नीलाम करे के बाद अभी शासन के खाता मा 20 करोड़ रुपिया जमा हे। एसडीएम उत्तम ध्रुव ह बताइन कि लिस्ट तइयार हे अउ सत्यापन के बाद पइसा लौटाए के प्रक्रिया सुरु कर दिए जाही।
जमीन नीलामी के घलो चलत हे तैयारी
यश ड्रीम कंपनी के ओ जमीन ला घलो फेर ले नीलाम करे के कोसिस करे जावत हे, जेला मोक्षित कापर्पोरेशन के संचालक ह लिए रिहिस। ए जमीन ला बेचे बर कतको बार इश्तहार निकाले गे हे, फेर अभी तक कोई खरीदार आगू नई आय हे। अधिकारी मन के कहना हे कि जमीन बिक्की त ओकर ले आय रकम ला घलो निवेशक मन ला बांट दिए जाही।
