रामनवमी के उल्लास म डूबे रायपुर: मठ-मंदिर म सजे हे भव्य झांकी, भजन-कीर्तन अउ आरती के संग होही आतिशबाजी
ram navami celebration raipur : रायपुर। रायपुर म आज रामनवमी के परब पूरे सरधा अउ उल्लास के संग मनाय जात हे। सहर के मठ अउ राम मंदिर मन ल चकाचौंध रोशनी अउ फूल मन ले सजाय गे हे। भगवान श्रीराम के जनम उत्सव ला लेके बिहनिया ले ही भक्ति के माहौल बने हे, अउ संझा के भव्य सोभायात्रा घलो निकारी जाही।
करीब 500 साल जुन्ना दूधाधारी मठ अउ जैतूसाव मठ म मंतर मन के जाप के संग भगवान राम, माता जानकी अउ लछमन जी के बिसेस अभिषेक करे जाही। महंत राम सुंदर दास ह भगवान मन ला सोन के मुकुट पहिरा के सिंगार करही। वीआईपी रोड के राम मंदिर ला घलो बहुते सुग्घर सजाया गे हे, जिहां संझा के आतिशबाजी घलो देखे बर मिलही।
ओही जगा, ब्राह्मणपारा के सोहागा मंदिर म आज सामूहिक सुंदरकांड पाठ के आयोजन करे गे हे। संझा 5:30 बजे ले भक्त मंडली मन भजन-कीर्तन करही। कार्यक्रम के बाद आरती अउ परसाद बांटे जाही, जेमा भारी भीड़ उमड़े के उम्मेद हे।
शांतिनगर श्रीराम मंदिर म आज बिसेस पूजा-पाठ अउ संकीर्तन होवत हे। बिहनिया 10:30 ले 11:30 बजे तक सुंदरकांड, ओखर बाद भजन अउ आरती होही। मंझनिया 2 बजे तक महापरसाद भंडारा के आयोजन हे, जिहां जम्मो श्रद्धालु मन परसाद पाहीं।
समता कॉलोनी के गायत्री शक्तिपीठ म रामनवमी के मउका म महापूर्णाहुति करे जात हे। इहां पंचकुंडीय गायत्री महायज्ञ चलत हे, जेमा मनखे मन आहुति देके समाज अउ देस के भलाई बर दुआ मांगत हें।
