दुर्ग-हरिद्वार के बीच चलही समर स्पेशल ट्रेन, यात्री मन ला मिलही सुविधा अऊ कंफर्म बर्थ
Summer Special Train : रायपुर, 26 मार्च 2026/ गरमी के दिन मं ट्रेन मं होवइया भीड़ ला देखत हुए रेलवे ह यात्री मन के सुविधा बर दुर्ग-हरिद्वार-दुर्ग के बीच 11-11 फेरा बर समर स्पेशल ट्रेन चलाए के फैसला करे हे। एखर ले यात्री मन ला आसानी ले कंफर्म बर्थ मिल सकही। गाड़ी संख्या 08743 दुर्ग-हरिद्वार साप्ताहिक स्पेशल ट्रेन, दुर्ग ले 19 अप्रैल ले 28 जून तक हर इतवार (Sunday) के चलही।
उहें, गाड़ी संख्या 08744 हरिद्वार-दुर्ग साप्ताहिक स्पेशल ट्रेन, हरिद्वार ले 20 अप्रैल ले 29 जून 2026 तक हर सोमार (Monday) के छूटही। ये ट्रेन ह दक्षिण पूर्व मध्य रेलवे के दुर्ग, रायपुर, भाटापारा, उसलापुर, पेंड्रारोड, अनूपपुर, शहडोल अऊ उमरिया स्टेशन मं रुकही।
ट्रेन के समय सारिणी
दुर्ग ले हरिद्वार (08743): ये ट्रेन हर इतवार के दुर्ग ले मंझनिया 11.00 बजे रवाना होही। रायपुर मं 11.36 बजे पहुंचही अऊ 11.41 बजे बाहिर निकलही। एखर बाद भाटापारा, उसलापुर, पेंड्रारोड अउ शहडोल होत हुए सोमवार के मंझनिया 11:25 बजे निजामुद्दीन अऊ संझा 5.30 बजे हरिद्वार स्टेशन पहुंचही।
हरिद्वार ले दुर्ग (08744): ये ट्रेन हर सोमवार के संझा 6.55 बजे हरिद्वार ले छूटही। रात 11.10 बजे निजामुद्दीन पहुंचही अऊ मंगलवार के संझा उमरिया, शहडोल अऊ अनूपपुर होत हुए बुधवार के बिहनिया 3.00 बजे दुर्ग स्टेशन पहुंचही।
ये स्पेशल ट्रेन मं कुल 18 कोच रहिहें, जेमं 2 एसएलआरडी, 4 जनरल, 10 स्लीपर अऊ 2 एसी-III के सुविधा यात्री मन ला मिलही।
कहाँ-कहाँ रुकही ट्रेन (स्टॉपेज)
ये ट्रेन दुनो डाहर ले रायपुर, भाटापारा, उसलापुर, पेंड्रारोड, अनूपपुर, शहडोल, उमरिया, कटनी मुड़वारा, दमोह, सागर, वीरांगना लक्ष्मीबाई झाँसी, ग्वालियर, धौलपुर, आगरा कैंट, मथुरा, कोसीकलाँ, निज़ामुद्दीन, मेरठ नगर अऊ रुड़की स्टेशन मं रुकही।
