पुलिस के बड़े कार्रवाई : अवैध रूप से गैस सिलेंडर बेचत दू झन धराइन, 45 कॉमर्शियल सिलेंडर जप्त
Chhattisgarh News : रायपुर, 26 मार्च 2026/ गैस के किल्लत ला देखत हुए रायपुर पुलिस ह बड़े कार्रवाई करे हे। मुखबिर के सूचना मं छापा मार के पुलिस ह अवैध रूप ले कॉमर्शियल गैस सिलेंडर बेचे बर ग्राहक खोजत दू झन आरोपी मन ला गिरफ्तार करे हे। ए कार्रवाई मं 45 नग छत्तीसगढ़ गैस के सिलेंडर अऊ एक ठन पिकअप गाड़ी ला जप्त करे गे हे। ये पूरा मामला रायपुर ग्रामीण के खरोरा थाना क्षेत्र के आय।
पुलिस ले मिले जानकारी के मुताबिक, 25 मार्च के सूचना मिले रहिस कि ग्राम चिचोली के ‘शान-ए-पंजाब’ ढाबा के आगू तिल्दा-खरोरा मेन रोड मं एक ठन सफेद पिकअप (CG 04 QK 6282) मं भारी मात्रा मं गैस सिलेंडर रख के ग्राहक खोजे जात हे। सूचना मिलते ही पुलिस के टीम ह मौका मं पहुंच के गाड़ी ला घेराबंदी करके धर लिस।
जांच के बखत गाड़ी मं एक ठन खाली इंडियन कंपनी के सिलेंडर, 37 ठन भरे हुए अऊ 7 ठन खाली छत्तीसगढ़ गैस के कॉमर्शियल सिलेंडर मिलिस। सबो 45 सिलेंडर मन के कीमत लगभग 74 हजार रुपिया बताए जात हे, अउ पिकअप के कीमत करीब 10 लाख रुपिया हे। मौका मं मौजूद ड्राइवर गिनेश्वर प्रसाद साहू (32 साल, निवासी कुरूद, आरंग) अऊ कंडक्टर लादूराम (29 साल, निवासी जोधपुर, राजस्थान) ले जब कागज मांगे गेिस, त उमन कोनो वैध दस्तावेज नई दिखा पाइन। पूछताछ मं उमन बताइन कि ये सबो सिलेंडर मालिक भूपेश्वर प्रसाद साहू के आय अऊ उखरे कहे मं ये काम ला करत रहिन।
पुलिस ह दुनो आरोपी मन ला धर के सिलेंडर अऊ गाड़ी ला जप्त कर लिस हे अऊ धारा 106 BNSS के तहत कार्रवाई करे हे। मामला खाद्य विभाग ले जुड़े होय के कारण आगे के कार्रवाई बर खाद्य निरीक्षक शुभा गुप्ता ला सुपुर्द कर दे गे हे।
