मेटा ल 3 हजार करोड़ के जुर्माना : लइका मन के मानसिक सेहत ला नुकसान पहुंचाए म कोर्ट ह सुनाइस बड़े फैसला
Meta Fine : सोशल मीडिया के दिग्गज कंपनी मेटा (Meta), जे मन इंस्टाग्राम, फेसबुक अऊ व्हाट्सएप चलाथें, ओखर ऊपर न्यू मैक्सिको के कोर्ट ह 375 मिलियन डॉलर (लगभग 3,000 करोड़ रुपये) के भारी-भरकम जुर्माना ठोक दे हे। कोर्ट ह मेटा ला लइका मन के मानसिक सेहत ला नुकसान पहुंचाए अऊ खतरा मन ला लुकाए के दोषी पाय हे।
मुनाफा बर लइका मन के सुरक्षा ले समझौता
लगभग सात हफ्ता तक चले सुनवाई के बाद जूरी ह ये फैसला सुनाइस। कोर्ट के कहना हे कि मेटा ला अपन प्लेटफॉर्म म लइका मन ले जुड़े खतरा मन के जानकारी रहिस, तभो ले कंपनी ह फायदा कमाए बर एला लुका के रखिस। चीफ जज ब्रायन बिडशाइड ह कहिस कि मेटा ह भ्रामक व्यापारिक तरीका अपनाइस अऊ लइका मन के कमजोरी के फायदा उठाइस।
37,500 मामला म मिलिस दोषी
जूरी ह मानिस कि मेटा ह जान-बूझके अइसन करे हे। कुल 37,500 मामला म कंपनी ला दोषी पाय गे हे, जेमा हर एक उल्लंघन बर 5,000 डॉलर के जुर्माना लगाय गे हे। ये मामला लइका मन के यौन शोषण अऊ मानसिक स्वास्थ्य ले जुड़े गलत जानकारी देय ले घलो जुड़े हे।
दुनिया भर म सोशल मीडिया पर सख्ती
मेटा के खिलाफ अइसने एक अउ मामला कैलिफोर्निया के कोर्ट म घलो चलत हे। लइका मन ला सोशल मीडिया के गलत प्रभाव ले बचाए बर दुनिया भर म सख्ती बढ़त हे:
ऑस्ट्रेलिया: 16 साल ले कम उमर के लइका मन बर इंस्टाग्राम अऊ अउ प्लेटफॉर्म के इस्तेमाल म रोक लगा दे हे।
जर्मनी: छोटे लइका मन बर सोशल मीडिया ला लेके कड़ा नियम बनाय गे हे।
ए फैसला ह दुनिया भर के टेक कंपनी मन बर एक बड़े सबक आय कि लइका मन के सुरक्षा ला नजरअंदाज करे म भारी कीमत चुकाना पड़ सकथे।
