दुर्ग, बलरामपुर के बाद अब रायगढ़ मा धराइस अफीम के खेती, पुलिस हिरासत मा झारखंड के एक आरोपी
Opium Farming Raigarh : रायगढ़: छत्तीसगढ़ के दुर्ग अउ बलरामपुर के बाद अब रायगढ़ जिला मा घलो अफीम के अवैध खेती के भंडाफोड़ होय हे। तमनार थाना क्षेत्र के आमाघाट मा नदी किनारे लगभग एक एकड़ जमीन मा तरबूज अउ ककड़ी के आड़ मा अफीम उगाय जात रहिस। सूचना मिलत च एसपी, एडिशनल एसपी अउ जिला प्रशासन के टीम ह मौका मा पहुँच के जांच सुरू कर दे हे। पुलिस ह झारखंड के एक आरोपी मार्शल सांगा ला हिरासत मा लेके पूछताछ करत हे। ये जमीन ह सरकारी आय या कोनो के निजी, एकर अभी जांच चलत हे।
दुर्ग मा भाजपा नेता के खेत मा मिलीस रहिस अफीम
बता दन कि सबले पहिली दुर्ग जिला के समोदा गांव मा भाजपा नेता विनायक ताम्रकार के खेत मा करीब पांच एकड़ मा अफीम के खेती धराय रहिस। ये मामला मा लापरवाही बरते के सेती ग्रामीण कृषि विस्तार अधिकारी एकता साहू ला सस्पेंड कर दे गे हे। पुलिस ह अभी तक राजस्थान अउ दुर्ग ले चार आरोपी मन ला गिरफ्तार कर चुके हे।
बलरामपुर मा मसाला के नांव मा ठग के कराय रहिन खेती
दुर्ग के बाद बलरामपुर के चंदाडांडी अउ त्रिपुरी गांव मा घलो अफीम के खेती धराय रहिस। इहां के किसान मन ला झारखंड के भूपेंद्र उरांव ह ‘कीमती मसाला’ के खेती कहिके झांसा दे रहिस। किसान मन ह लालच मा आके खेत ला लीज मा दे द़े रहिन। पुलिस के पहुँचे के पहिली च पहरेदारी करेइय्या झारखंड के 4-5 लोगन मन फरार हो गे रहिन।
