सावधान! गैस सिलेंडर के नाम ले होवत हे भारी ठगी, एक गलती अउ आप मन के बैंक खाता हो जाही खाली
LPG Cylinder Scam : नई दिल्ली : अभी के बखत में दुनिया भर में तेल अउ गैस के भारी किल्लत चलत हे, अउ एही मुसकिल के फायदा अब साइबर ठग मन उठावत हें। गैस सिलेंडर के जल्दी डिलीवरी कराए के लालच देके ठग मन अब मनखे मन के बैंक खाता साफ करत हें। अगर आप मन घलोक गैस बुकिंग करत हव, त ये खबर ल ध्यान ले पढ़व।
‘कल मिल जाही गैस’ कहिके भेजत हें फर्जी मैसेज
ठग मन ह सोशल मीडिया, WhatsApp अउ SMS के रद्दा ले ‘Pay Now, Get Gas Tomorrow’ (अभी पईसा दव, कल गैस पाव) अइसन मैसेज भेजत हें। गैस एजेंसी मन में भीड़ ल देखके मनखे मन ह सोंचथें कि पईसा देके जल्दी गैस मिल जाही। जैसे ही कोनो ओ मैसेज में आय लिंक ल क्लिक करथे अउ पईसा भेजथे, ओ पईसा ह सीधा ठग मन के खाता में चल जाथे।
फर्जी विज्ञापन ले घलोक रहो सावधान
ठग मन ह Indane, HP अउ Bharat Gas जइसन कंपनी मन के ‘लोगो’ (Logo) अउ फोटो के इस्तेमाल करके सोशल मीडिया में फर्जी विज्ञापन घलोक चलावत हें। ये विज्ञापन मन में कम दाम या जल्दी गैस देय के वादा करे जाथे। जइसने कोनो अपन बैंक के जानकारी ओ लिंक में भरथे, ओकर खाता ले सबो पईसा पार हो जाथे।
ठगी ले कइसे बचबो? (बचाव के तरीका)
पहिली पईसा झन दव: कोनो घलोक असली गैस कंपनी ह सिलेंडर बुक करे के बखत एडवांस में पईसा नई मांगे।
अधिकारक रद्दा अपनाव: गैस बुक करे बर सिर्फ कंपनी के आधिकारिक ऐप, वेबसाइट या एजेंसी के नंबर के ही इस्तेमाल करव।
लिंक ले बचव: कोनो अनजान आदमी के भेजे लिंक ल क्लिक झन करव अउ न ही अपन UPI पिन या OTP कोनो ल बताव।
बैंक जानकारी: कोनो घलोक अनजान वेबसाइट में अपन बैंक खाता या कार्ड के डिटेल झन भरव।
अगर ठगी हो गे त का करबो?
अगर आप मन के साथ कोनो घलोक परकार के ऑनलाइन धोखाधड़ी हो जाथे, त तुरंत साइबर क्राइम हेल्पलाइन नंबर 1930 में फोन करव। जितना जल्दी आप मन रिपोर्ट करहू, पईसा वापस मिले के उम्मीद ओतके जादा रही.
