T20 वर्ल्ड कप जीत के बाद टीम इंडिया ऊपर रुपिया के बरसात: BCCI देही 131 करोड़ के भारी-भरकम इनाम
BCCI Prize Money : अहमदाबाद : सूर्यकुमार यादव के कप्तानी म टीम इंडिया ह नवा इतिहास रच दे हे। टी20 वर्ल्ड कप 2026 के फाइनल म न्यूजीलैंड ला हराय के बाद भारतीय क्रिकेट कंट्रोल बोर्ड (BCCI) ह चैंपियन टीम बर खजाना खोल दे हे। बोर्ड ह टीम इंडिया बर 131 करोड़ रुपिया के इनाम के घोषणा करे हे। अहमदाबाद के नरेंद्र मोदी स्टेडियम म जीत के झंडा गाड़े के बाद अब खिलाड़ी मन ऊपर पईसा के बरसात होवत हे।
2024 के रिकॉर्ड घलो टूट गे
बीसीसीआई ह इनाम देय के मामला म अपन खुद के पुराना रिकॉर्ड ला घलो तोड़ दे हे। साल 2024 म जब रोहित शर्मा के कप्तानी म भारत ह वर्ल्ड कप जीते रिहिस, तब बोर्ड ह 125 करोड़ रुपिया देय के एलान करे रिहिस। ए बार टीम के बड़े उपलब्धि ला देखत हुए इनामी राशि ला बढ़ा के 131 करोड़ रुपिया कर दे गे हे।
सूर्यकुमार के कप्तानी म कमाल
ए बार टीम इंडिया के कमान ‘मिस्टर 360’ सूर्यकुमार यादव के हाथ म रिहिस। पूरा टूर्नामेंट म भारतीय टीम ह जबरदस्त खेल दिखाइस। फाइनल मैच म न्यूजीलैंड ला धूल चटा के भारत ह फिर ले दुनिया ला बता दिस कि क्रिकेट म ओखर लोहा काबर माने जाथे।
भारत ह बनाइस 2 बड़े ऐतिहासिक रिकॉर्ड
ए जीत के संग भारत ह क्रिकेट के दुनिया म अइसन कारनामा कर दे हे, जेला आज तक कोनो देस नइ कर पाय रिहिस:
खिताब बचाय वाला पहिली टीम: भारत ह टी20 वर्ल्ड कप के इतिहास म अपन खिताब (Title) ला सफलतापूर्वक बचाय वाला दुनिया के पहिली टीम बन गे हे।
तीन बार के चैंपियन: अब भारत ह टी20 वर्ल्ड कप ला 3 बार जीते वाला इकलौता देस बन गे हे।
BCCI ह ए ऐतिहासिक जीत बर टीम के सबो खिलाड़ी, सपोर्ट स्टाफ अउ चयनकर्ता मन ला बधाई दे हे।
