IND vs ENG: टीम इंडिया ह पहुँचिस वर्ल्ड कप के फाइनल म, छत्तीसगढ़ के नेता मन दीन बधाई
T20 World Cup 2026 : रायपुर। टी-20 वर्ल्ड कप 2026 के सेमीफाइनल म भारत ह इंग्लैंड ल 7 रन ले हरा के फाइनल म जगह बना ले हे। टीम इंडिया के ए सानदार जीत ऊपर मुख्यमंत्री विष्णुदेव साय, डिप्टी सीएम विजय शर्मा, मंत्री ओपी चौधरी अउ पूर्व मुख्यमंत्री भूपेश बघेल संग कतकोन नेता मन ह खुसी जतावत भारतीय टीम ल बधाई दीन हें।
मुख्यमंत्री विष्णुदेव साय ह ‘एक्स’ (Twitter) म पोस्ट करके लिखिन— “टीम इंडिया ल गाड़ा-गाड़ा बधाई। सेमीफाइनल के रोमांचक मैच म आज भारतीय टीम ह जुझारू खेल देखावत इंग्लैंड ल हराइस अउ बड़े आन-बान-सान के संग फाइनल म पहुँचिस। जम्मो खिलाड़ी मन ह गजब के टीम वर्क अउ साहस देखाइन हें, जेकर ले पूरा देस गरब ले भर गे हे। ये जीत हमर तिरंगा के सान के प्रतीक आय।”
अद्भुत प्रदर्शन ले बढ़िस मान: विजय शर्मा डिप्टी सीएम अउ गृहमंत्री विजय शर्मा ह कहिन कि संजू सैमसन के बल्लेबाजी, बुमराह के घातक गेंदबाजी, हार्दिक के ऑलराउंडर खेल अउ अक्षर पटेल के फील्डिंग ह मैच म जान फूंक दिस। पूरा टीम ह एक साथ मिलके अद्भुत खेल देखाइन, जेकर ले ये जीत यादगार बन गे। अब फाइनल म घलो अइसने जज्बा के संग जीत के झंडा गड़ही।
मंत्री ओपी चौधरी अउ भूपेश बघेल घलो जताइन खुसी वित्त मंत्री ओपी चौधरी ह लिखिन कि वर्ल्ड कप जीते ले अब टीम इंडिया बस एक कदम दूर हे। जम्मो खिलाड़ी मन के मेहनत रंग लानिस। ओखरे संग पूर्व मुख्यमंत्री भूपेश बघेल ह घलो बधाई देवत कहिन कि आज के मैच रोमांच ले भरे रिहिस। अक्षर पटेल अउ तिलक वर्मा के कैच, बुमराह अउ शिवम दुबे के आखिरी ओवर मन ह जीत म बड़े भूमिका निभाइन। जम्मो क्रिकेट प्रेमी मन ल घलो ये जीत के बधाई।
