13 मेमू ट्रेन मन दू दिन बर रद्द, रेल यात्री मन के बढ़िस परेशानी
Chhattisgarh Railway News : रायपुर। दक्षिण पूर्व मध्य रेलवे (SECR) के नागपुर मंडल म चलत तकनीकी काम के सेती छत्तीसगढ़ के रेल यात्री मन के मुसकिल ह एक बार फिर ले बढ़ गे हे। रेलवे कोति ले मिले जानकारी के मुताबिक, नागपुर मंडल के अंतर्गत आने वाला बोरतलाव–दरेकसा अउ गुदमा–गोंदिया सेक्शन म जरूरी मरम्मत अउ तकनीकी सुधार के काम करे जावत हे। ए काम ल पूरा करे बर रेलवे ह ‘ब्लॉक’ ले हे, जेकर सीधा असर ट्रेन मन के आवाजाही ऊपर परत हे।
ए तकनीकी काम के सेती कुल 13 मेमू (MEMU) स्पेशल ट्रेन मन ल दू दिन बर पूरी तरह ले रद कर दे गे हे। रायपुर, दुर्ग अउ राजनांदगांव ले नागपुर डहर जावइया अउ ओती ले आवन-जावन करइया हजारों यात्री मन बर ये खबर कोनो झटका ले कम नइ हे। खास करके ओ मनखे मन ल जादा दिक्कत होवत हे जे मन रोज काम-बुता बर ये ट्रेन मन के भरोसा म रहिथे। रेलवे ह साफ करे हे कि आज अउ काली ये ट्रेन मन पटरी म नइ दउड़ही।
कतकोन एक्सप्रेस ट्रेन मन घलो परभावित सिरिफ मेमू ट्रेनच नोहे, बल्कि कतकोन बड़े एक्सप्रेस ट्रेन मन के ऊपर घलो ए काम के गाज गिरिस हे। टाटानगर–इतवारी एक्सप्रेस अउ कोरबा–इतवारी एक्सप्रेस जइसन महत्वपूर्ण ट्रेन मन के रदद होय ले या ओकर रस्ता बदले ले यात्री मन ह हलाकान होवत हें। रेलवे के कहना हे कि ये ट्रेन मन दुर्ग–बोरतलाव सेक्शन के बीच म जादा परभावित रही। कतकोन ट्रेन मन ल बीच के स्टेशन मन म ही रोक दे जाही या ओ मन ल ‘शॉर्ट टर्मिनेट’ करे जाही।
यात्री मन बर फजीहत अचानक ट्रेन मन के रद होय ले स्टेशन मन म यात्री मन के भारी भीड़ देखे बर मिलत हे। रायपुर अउ दुर्ग स्टेशन म कतकोन मनखे मन ल अपन टिकट कैंसिल कराए बर लाइन म खड़े देखे गिस। रेलवे के कहना हे कि ये काम सुरक्षा अउ सुग्घर संचालन बर जरूरी हे, पर आम मनखे मन बर ये ‘ब्लॉक’ ह मुसीबत बन गे हे। यात्री मन के कहना हे कि रेलवे ल अइसन काम के जानकारी अउ जादा दिन पहिली देना चाही ताकि ओ मन अपन आने व्यवस्था कर सकें।
