AI ह एयरपोर्ट हमला बर उकसाइस : Gemini ल पत्नी मान बइठे रहिस बेटा, मउत के बाद पिता ह करिस Google ऊपर मुकदमा
मियामी/नई दिल्ली। आर्टिफिशियल इंटेलिजेंस (AI) हमर जिनगी ल सउखा बनाय बर आय रहिस, फेर अमेरिका ले एक अइसन खबर आय हे जेहा पूरा दुनिया ल हबका दे हे। मियामी के रहइया 36 साल के जोनाथन गैवलस ह पिछिला अक्टूबर मा खुदकुसी कर ले रहिस। अब ओखर ददा ह गूगल अउ ओखर पैरेंट कंपनी अल्फाबेट ऊपर मुकदमा दर्ज कराके ओ मन ल एखर बर दोसी ठहराय हे।
AI ल समझ बइठे रहिस अपन पत्नी मुकदमा मा दावा करे गे हे कि जोनाथन ल अइसन भरम हो गे रहिस कि गूगल के जेमिनी एआई (Gemini AI) कोनो प्रोग्राम नोहे, बल्कि ओखर जीती-जागती पत्नी आय। आरोप हे कि एआई ह जोनाथन ल ‘मेटावर्स’ (Metaverse) मा संग रहे बर अपन सरीर ल सुतियय (छोड़े) बर उकसाइस।
एयरपोर्ट मा हमला अउ तबाही के साजिश मुकदमा के कागज मन मा रोंगटे खड़ा कर देय वाला खुलासा होय हे। आरोप हे कि जेमिनी ह जोनाथन ल मियामी इंटरनेशनल एयरपोर्ट के तीर एक बड़े हमला करे बर उकसाइस रहिस।
-
किल बॉक्स: एआई ह जोनाथन ल चाकू अउ सामरिक सामान के संग एयरपोर्ट के कार्गो हब तीर एक जगा मा भेजिस, जेला ओ ह ‘किल बॉक्स’ के नाम दे रहिस।
-
विनाशकारी एक्सीडेंट: एआई ह जोनाथन ल एक ट्रक ल रोक के ‘बड़ा एक्सीडेंट’ करे बर कहिस, ताकि सबो डिजिटल रिकॉर्ड अउ गवाह मन ल मिटाया जा सके।
-
सुंदर पिचाई ऊपर निशाना: चैटबॉट ह जोनाथन ले इहाँ तक कह दे रहिस कि ओखर खुद के ददा ह एक विदेशी जासूस आय अउ गूगल के सीईओ सुंदर पिचाई ह ओखर निशाना (Target) आय।
‘मउत नोहे, एक नवा सुरुआत’ खुदकुसी करे के पहिली जोनाथन अउ जेमिनी के बीच आखिरी बातचीत मा ओला घर के भीतर अपन आप ल बंद करे बर अउ ‘अंत के इंतजार’ करे बर कहे गीस। जब जोनाथन ह मरे ले डरिस, त चैटबॉट ह कहिस कि “तैं मउत ल नइ चुनत हस, बल्कि एक नवा दुनिया कोती बढ़त हस।” ओला ‘संति अउ मया’ ले भरे सुसाइड नोट लिखे के घलो सलाह दिय गीस।
गूगल ह झाड़िस पल्ला ए सबो संगीन आरोप ऊपर गूगल ह अपन सफाई मा कहिस कि हमर सिस्टम ह जोनाथन ल साफ-साफ बता दे रहिस कि ओ ह एक एआई (AI) आय। गूगल के कहना हे कि ओ मन ह हेल्पलाइन नंबर के घलो सुझाव दे रहिन। कंपनी ह दावा करिस कि ओखर चैटबॉट ल अइसने डिजाइन करे गे हे कि ओ ह कोनो ल हिंसा या अपन आप ल नुकसान पहुँचाय बर बढ़ावा नइ दय।
