सोना गिरवी रखे बर जावत हव? पहिली जान लव 2026 के नवा नियम, कहुं हो न जाय नुकसान
Gold Loan Rules 2026 : मुसीबत के बखत घर मा रखे सोना ह हमेशा ले सबले बड़े सहारा रहिथे। साल 2026 मा डिजिटल बैंकिंग अउ रिजर्व बैंक (RBI) के नवा नियम मन ह गोल्ड लोन के तरीका ल पहिली ले जादा सुरक्षित अउ साफ-सुथरा बना दे हे। अगर आप घलो बिहाव, बिजनेस या कोनो डॉक्टरी इमरजेंसी बर गोल्ड लोन ले के सोंचत हव, त ये खबर आप मन बर बड़ काम के हे।
आपके सोना मा कतका पइसा मिलही?
जब आप बैंक मा सोना जमा करथो, त बैंक ह ओखर सुद्धता अउ बजार भाव के जाँच करथे। एला लोन-टू-वैल्यू (LTV) कहे जाथे।
75% के नियम: नियम के मुताबिक, आपके सोना के कुल कीमत के जादा ले जादा 75% हिस्सा ही आप मन ल करजा के रूप मा मिल सकथे।
सिरिफ़ सोना के मोल: ध्यान रखिहव, बैंक ह सिरिफ़ आपके गहना मा जतका सुद्ध सोना हे, ओखरे वजन ल नापथे। ओमा जड़े हीरा, मोती या मेकिंग चार्ज के कीमत ल लोन मा नइ जोड़े जाय।
कौन ले सकथे गोल्ड लोन?
गोल्ड लोन के सबले नीक बात ये हे कि एमा जादा कागजी कार्यवाही के जरूरत नइ पड़े:
उमर अउ कागज: आपके उमर कम से कम 18 साल होना चइही अउ आपके तीर आधार कार्ड अउ पैन कार्ड जइसन KYC कागज होना जरूरी हे।
सिबिल स्कोर (CIBIL): पर्सनल लोन के तुलना मा इहाँ सिबिल स्कोर के अतका महतव नइ राहय, काबर कि आपके सोना ह बैंक तीर गारंटी के रूप मा जमा रहिथे।
घर बइठे लोन: 2026 मा अब कतको बैंक मन आपके घर आके सोना के जाँच करथें अउ मात्र 30 ले 45 मिनट मा पइसा आपके खाता मा ट्रांसफर कर देथें।
लोन नइ चुकाय मा का होही?
लोन लेवत बखत ओला वापस करे के सरत मन ल समझना बड़ जरूरी हे:
90 दिन के समय: अगर आप लगातार 90 दिन तक किस्ती या ब्याज नइ चुकावव, त बैंक ल आपके सोना नीलाम करे के अधिकार मिल जाथे।
नीलामी के नियम: नवा नियम के मुताबिक, नीलामी करे के 14 दिन पहिली ग्राहक ल सरकारी नोटिस देना जरूरी हे।
पइसा वापसी: यदि नीलामी मा आपके सोना के कीमत ह आपके बकाया लोन ले जादा निकलथे, त बैंक ल बचा होय पइसा ल ग्राहक ल वापस करना होही।
