छत्तीसगढ़ विधानसभा: बजट सत्र में भूपेश बघेल के चुटकी लेत ठहाका गूँजिस, भावना बोहरा के सवाल अउ मंत्री मन के जवाब

Budget Session 2026 : रायपुर: छत्तीसगढ़ विधानसभा के बजट सत्र के तीसरा दिन आज सदन में गजब के माहौल देखन बर मिलिस। प्रश्नकाल के दौरान पंडरिया विधायक भावना बोहरा ह जब जनहित के मुद्दा मन ल उठाइन, त पूर्व मुख्यमंत्री भूपेश बघेल ह गृह मंत्री विजय शर्मा अउ भावना बोहरा के बीच के ‘दूरी अउ नजदीकी’ ल लेके अइसन चुटकी लीन कि पूरा सदन ठहाका ले गूँज गे।

नल-जल योजना अउ गर्मी के तैयारी:
विधायक भावना बोहरा ह प्रदेश में नल-जल योजना के स्थिति अउ आने वाला गरमी में पानी के किल्लत ल लेके सवाल पूछिन। उपमुख्यमंत्री अरुण साव ह लिखित जवाब में बताइन कि:

बीते 12 महीना में राज्य के जम्मो जिला मन के ग्रामीण इलाका ल नल-जल योजना ले जोड़ ले गे हे, फेर शहर मन में ये योजना लागू नइ हे।

लक्ष्य पूरा करे के मामला में छत्तीसगढ़ अभी 24वें नंबर में हे।

गरमी बर 15 मार्च ले 15 अप्रैल तक ‘विशेष हैंडपंप संधारण अभियान’ चलाय जाही।

नगरीय निकाय मन ल पानी के संकट दूर करे बर 18.03 करोड़ रुपिया जारी करे गे हे।

कबीरधाम में उद्योग अउ रोजगार:
उद्यौग मंत्री लखन लाल देवांगन ह बताइन कि कबीरधाम जिला में जनवरी 2026 तक 102 लघु अउ 01 मध्यम उद्योग पंजीकृत हें। अप्रैल 2024 ले जनवरी 2026 तक इन्वेस्टर समिट के माध्यम ले 5,51,524.87 करोड़ रुपिया के निवेश के सहमति पत्र (MOU) भरे गे हे। मंत्री ह ये घलो बताइन कि नवा औद्योगिक नीति के तहत स्थानीय युवा मन ल 70% रोजगार दे के नियम के पालन बर पिछला 3 महीना में 167 ठन निरीक्षण करे गे हे।

महिला श्रमिक मन के सुरक्षा:
महिला श्रमिक मन के वेतन, सुरक्षा अउ यौन उत्पीड़न के मुद्दा में मंत्री ह बताइन कि पिछला 2 साल में 289 शिकायत मिली रहिस, जेमे ले 250 के निराकरण कर दे गे हे। हालांकि, अभी महिला मन बर कोनो अलग ले विशेष हेल्पलाइन या ऑनलाइन पोर्टल नइ हे।

रायपुर के डिवाइडर विज्ञापन ले आय:
राजधानी रायपुर के सड़क डिवाइडर मन में लगे विज्ञापन पोल के बारे में उपमुख्यमंत्री ह बताइन कि ये सबो सरकारी (नगर निगम) आय। ए विज्ञापन मन ले 9 फरवरी 2026 तक कुल 19,90,51,257 रुपिया के आय होय हे।