अग्निवीर भर्ती बर ऑनलाइन पंजीयन सुरू, एतके तारीख तक कर सकथव आवेदन
Agniveer Recruitment : रायपुर। भारतीय सेना म अग्निवीर भर्ती बछर 2027 बर ऑनलाइन पंजीयन के बुता सुरू हो गे हे। जे मनखे मन एमा सामिल होना चाहथें, ओ मन जॉइन इंडियन आर्मी के आधिकारिक वेबसाइट www.joinindianarmy.nic.in म जाके 01 अप्रैल 2026 तक अपन नांव लिखा सकथें।
ए भर्ती के तहत ऑनलाइन कॉमन एंट्रेंस एग्जाम (सीईई) जुलाई-अगस्त 2026 म होही। जउन लइका मन परीक्षा म पास होहीं, ओ मन ल जनवरी 2027 म होवइया रैली बर बुलाय जाही।
भर्ती ऑफिस ले मिले जानकारी के मुताबिक, छत्तीसगढ़ बर अग्निवीर के पद मन के संख्या ह पंजीयन कराएइया मन के संख्या के आधार म तय करे जाथे। पिछला तीन बछर के आंकड़ा देखबो त, साल 2023-24 म 14,153 झन पंजीयन कराइन अउ 895 पद मिलिस, साल 2024-25 म 19,355 पंजीयन म 731 पद मिलिस, अउ साल 2025-26 म 28,547 युवा मन ह पंजीयन कराइन। ए हिसाब ले अंदाजा लगाय जावत हे कि ए दारी छत्तीसगढ़ बर 1100 ले 1300 पद मिल सकथे।
