चाऊमीन बर ‘चकल्लस’: नूडल्स बर भिड़ गे बाराती-घराती, फेर दुलहिन जो करिस ओला सुन के दंग रह जाहो
आगरा। उत्तर प्रदेश के कासगंज ले एक अजब-गजब मामला आगू आए हे, जिहां खाय के एक प्लेट बर हड़कंप मच गे। बरात में चाऊमीन बर बाराती अउ घराती मन अइसन भिड़िन कि मामला सीधा पुलिस थाना तक पहुँच गे। बात अतका बढ़ गे कि दुलहिन ह बिहाव करे ले साफ मना कर दिस अउ दूल्हा ल बिना दुलहिन के खाली हाथ वापस लौटे बर पड़िस।
चाऊमीन के स्टाल में शुरू होइस ‘लड़ई-झगड़ा’
ये पूरा मामला गंजडुंडवारा इलाका के श्रीराम गेस्ट हाउस के आय। सिढपुरा के रहे वाला एक जुवान लइका के बरात बड़े धूमधाम ले पहुँचे रिहिस। बिहाव के रस्म मन अभी आधा-अधूरा ही होय रिहिस कि चाऊमीन के स्टाल करा बाराती अउ घराती मन के बीच कहा-सुनी शुरू हो गे। देखत-देखत बात अतका बढ़ गे कि दूनों कोती ले मारपीट होय लगिस।
दुलहिन बोलिस- ‘अइसन घर नई जावंव’
जब दुलहिन ल पता चलिस कि बाराती मन हा चाऊमीन जइसन छोटे बात बर अतका तमाशा अउ मारपीट करे हें, त ओखर पारा चढ़ गे। दुलहिन ह तुरंत फैसला लिस कि जे मन खाय-पिए बर झगड़ा करथें, ओ मन के घर वो बिहाव करके नई जाही। दुलहिन ह मंडप में बैठे ले साफ मना कर दिस।
थाना में होइस फैसला
मौका में पहुँच के पुलिस ह दूनों पक्ष ल समझाए के कोसिस करिस अउ थाना ले गे। फेर दुलहिन अपन बात में अडिग रिहिस। आखिरी में दूनों कोती के लोग मन आपसी सहमति ले बिहाव ल कैंसिल कर दीन। ओखर बाद दूल्हा अउ ओखर परिवार बिना दुलहिन के वापस लौट गे। अब ये ‘चाऊमीन कांड’ के चर्चा पूरा इलाका में होवत हे।
