छत्तीसगढ़ विधानसभा के बजट सत्र आज ले : वित्त मंत्री चौधरी पेश करही आर्थिक सर्वेक्षण
Chhattisgarh Assembly : रायपुर। छत्तीसगढ़ विधानसभा के बजट सत्र के आगाज़ आज 23 फरवरी ले होवत हे, जेकर समापन 20 मार्च के होही। ए दौरान सदन में कुल 15 बैठक मन आयोजित करे जाही। सत्र के शुरुआत राज्यपाल रमेन डेका के अभिभाषण ले होही। ओखर बाद कृतज्ञता ज्ञापन प्रस्ताव लाए जाही, जेखर तुंरत बाद वित्त मंत्री ओपी चौधरी बछर 2025-26 के आर्थिक सर्वेक्षण (Economic Survey) सदन के आगू रखिहें।
राज्यपाल के अभिभाषण अउ कृतज्ञता ज्ञापन प्रस्ताव उपर 25 फरवरी के सदन में चर्चा होही। ए सत्र के बेरा में अविभाजित मध्यप्रदेश के दिवंगत विधायक दीनदयाल पोर्ते ल घलोक सदन कोती ले श्रद्धांजलि दी जाही।
सत्र बर आए हे 2813 सवाल
बजट सत्र ल लेके प्रदेश के विधायक मन कोती ले कुल 2813 प्रश्न लगाए गए हे। एमां 1437 तारांकित अउ 1378 अतारांकित सवाल सामिल हे। एकर अलावा ध्यानाकर्षण के 61 सूचना मन घलोक मिली हे। नियम 139 के तहत लोक महत्व के विषय उपर चर्चा बर घलोक सूचना आए हे। संग ही 13 अशासकीय संकल्प, 9 शून्यकाल सूचना अउ 112 याचिका मन के जानकारी घलोक विधानसभा सचिवालय ल मिल चुके हे।
24 फरवरी के पेश होही बजट
वित्तीय बछर 2026-27 बर राज्य के बजट 24 फरवरी के मंझनिया 12.30 बजे विधानसभा में पेश करे जाही। बजट उपर 26 अउ 27 फरवरी के सामान्य चर्चा होही। एकर बाद 9 ले 17 मार्च तक विभागवार अनुदान मांग मन उपर बहस चले। आखिरी में 17 मार्च के विनियोग विधेयक उपर चर्चा होही अउ 18 मार्च के एला पारित करे जाही।
