सामूहिक कन्या विवाह म फर्जीवाड़ा; शादीशुदा जोड़ा ह सरकारी पईसा बर फेर रचाईस बिहाव
Mukhyamantri Kanya Vivah Yojana Fraud : कांकेर। मुख्यमंत्री सामूहिक कन्या विवाह योजना म फर्जीवाड़ा के एक बड़े मामला आगू आए हे। कांकेर के गोविंदपुर म बीतल 10 फरवरी के सामूहिक बिहाव के आयोजन करे गे रहिस, जिहां एक अइसन जोड़ा ह फेर ले सात फेरा ले लीस जेखर बिहाव पहिली ले हो चुके रहिस। सोशल मीडिया म फोटो वायरल होय के बाद ये गड़बड़ी के खुलासा होइस, जेखर सेती अब सरकारी जांच-परख के तरीका उपर घलो सवाल उठत हे।
असन हे पूरा मामला: ग्राम पंचायत प्रेमनगर के सुदीप विश्वास अऊ पीवी 64 के स्वर्णा मिस्त्री के बिहाव 3 जून 2025 के सामाजिक रीति-रिवाज ले हो चुके रहिस। दूनों संग म रहत घलो रहिन। फेर योजना के तहत मिलइया 50 हजार रूपया के लालच म ये मन अपन नाम फेर लिखवा दीन अऊ 10 फरवरी के आयोजन म दोबारा बिहाव रचा लीन। फोटो म लड़की ह सिंदूर अऊ बंगाली परंपरा के ‘पोला’ पहिरे दिखत हे, जेखर ले साफ पता चलत हे कि ओखर बिहाव पहिली ले हो चुके हे।
अधिकारी मन के लापरवाही: ये मामला म आंगनबाड़ी कार्यकर्ता अऊ सेक्टर सुपरवाइजर के लापरवाही घलो आगू आवत हे। नियम के मुताबिक वधू पक्ष के आंगनबाड़ी केंद्र ले आवेदन होना चाही, फेर ए मन बिना जांच-पड़ताल करे आवेदन स्वीकार कर लीन। पंचायत ले घलो अविवाहित होय के प्रमाण पत्र ले ले गे रहिस। अब प्रशासन ह ये मामला के जांच के बात कहत हे अऊ दोषी मन उपर कार्रवाई करे के संकेत दे हे।
