पुलवामा आतंकी हमला बरसी : पीएम मोदी ह शहीद जवान मन ल दीन श्रद्धांजलि, बोलिन- देस बर तुंहर समरपन सदा याद रही
रायपुर। पुलवामा आतंकी हमला के बरसी म शहीद जवान मन ल पीएम नरेंद्र मोदी ह सरधांजलि अर्पित करिन हे। प्रधानमंत्री मोदी ह जवान मन के बलिदान ल सुरता करत कहिन कि ओमन के अदम्य साहस, देसभक्ति अउ समरपन हर भारतीय बर प्रेरणा के सोत आय।
बता दन कि 14 फरवरी 2019 के होय आतंकी हमला म 40 जवान मन ह देस बर अपन प्रान न्योछावर कर दे रिहिन। प्रधानमंत्री ह कहिन कि 2019 म आजे के दिन पुलवामा म सहीद होय वीर जवान मन ल सत-सत नमन हे। सोशल मीडिया प्लेटफार्म ‘एक्स’ म पोस्ट करत पीएम ह लिखिन, “2019 के आजे दिन पुलवामा म अपन जान देय वइया बहादुर नायक मन ल सुरता करत हन। देस बर ओमन के भगती, संकल्प अउ सेवा हमर मन म हमेसा बसे रही। हर भारतीय ल ओमन के हिम्मत ले ताकत मिलथे।”
एकर ले पहिली उपराष्ट्रपति सीपी राधाकृष्णन घलो बहादुर सीआरपीएफ जवान मन ल बिनम्र सरधांजलि दीन। उपराष्ट्रपति ह ओमन के बलिदान ल सुरता करत कहिन कि ये सदा बर भारतीय इतिहास म दरज हो गे हे अउ जुग-जुग तक देस ल प्रेरणा देवत रही।
14 फरवरी 2019 के होय रिहिस घातक हमला जम्मू अउ कश्मीर के पुलवामा जिला म 14 फरवरी 2019 के श्रीनगर-जम्मू नेशनल हाईवे म सीआरपीएफ के काफिला ल निशाना बना के हमला करे गे रिहिस, जेमा 40 ले जादा जवान सहीद हो गे रिहिस। पुलवामा हमला ह न केवल भारत अउ पाकिस्तान के बीच तनातनी बढ़ा दिस, बल्कि पूरी दुनिया म आतंकवाद अउ सुरक्षा ल लेके चरचा घलो सुरु हो गे। अपन जान देय वइया 40 बहादुर जवान मन के सुरता म आज के दिन ल ‘ब्लैक डे’ के रूप म मनाय जाथे।
