बस्तर पंडुम: 5 साल म बदल जाही बस्तर के सूरत, 31 मार्च 2026 तक नक्सलवाद खत्म करे के लक्स – अमित शाह
31 मार्च 2026 तक नक्सलवाद मुक्त होही बस्तर गृह मंत्री ह जवान मन के हिम्मत ला बढ़ावत कहिन कि 31 मार्च 2026 तक बस्तर ला पूरी तरह ले नक्सलवाद मुक्त कर दे जाही। ओमन नक्सली मन ले अपील करिन कि हथियार छोड़ के मुख्यधारा म लहुट आएं, सरकार ओखर बर सबो व्यवस्था करही। ‘पूना मारगेम’ योजना के तहत अभी तक करीब 2500 माओवादी मन ह सरेंडर कर डरे हें।
गाँव-गाँव म बिजली अऊ स्कूल के सुविधा विकास के काम मन के जानकारी देवत शाह ह कहिन कि हर 5 किलोमीटर म बैंक खुलही अऊ 27 दिसंबर ले पहिली सबो गाँव म बिजली पहुँच जाही। माओवादी मन जउन स्कूल मन ला 40 साल ले बंद करवा दे रहिन, सासन ह ओला फिर ले खोल दे हे। युवा मन बर 128 एकड़ म नवा औद्योगिक क्षेत्र बनही अऊ 90 हजार लइका मन ला काम-काज के ट्रेनिंग दे जाही।
पर्यटन अऊ खेती-किसानी बर बड़े योजना बस्तर म पर्यटन ला बढ़ाए बर ‘ग्लास ब्रिज’ अऊ ‘होम स्टे’ जइसन सुविधा बनाय जाही। दंतेवाड़ा, सुकमा अऊ बीजापुर जिला के पौने तीन लाख एकड़ खेत म पानी पहुँचाय बर सिंचाई योजना बनही। इकर संग चउक, रावघाट अऊ नदी जोड़ो परियोजना ला घलो तेजी ले बढ़ाय जाही।
मुख्यमंत्री साय ह कहिन- खत्म होवत हे नक्सलवाद मुख्यमंत्री विष्णु देव साय ह कहिन कि अमित शाह के इच्छाशक्ति ले ही बस्तर म 40 साल पुराना नक्सलवाद अब आखिरी सांस लेवत हे। ए बार गणतंत्र दिवस म 40 ले जादा अइसन गाँव मन म तिरंगा फहराय गे हे, जहाँ पहिली कभु तिरंगा नइ फहराय रहिस।
बस्तर पंडुम म कला के मेला ए बार के बस्तर पंडुम ऐतिहासिक रहिस, जेमा 12 अलग-अलग विधा म बस्तर संभाग के 55 हजार ले जादा कलाकार मन अपन हुनर देखाइन। कार्यक्रम के आखिरी म विजेता मन ला इनाम घलो बांटे गे।
