कवर्धा म ‘सट्टा किंग’ राजा सरदार गिरफ्तार, महादेव एप के बाद अब ‘किंगडम बुक’ ले खेलावत रहिस ऑनलाइन सट्टा

कवर्धा :  छत्तीसगढ़ म ऑनलाइन सट्टा एप ‘महादेव’ के बाद अब नवा-नवा एप मन के जरिए सट्टा के कारोबार चलत हे। कवर्धा पुलिस ह अइसने एक मामला म ‘किंगडम बुक डॉट कॉम’ नाम के प्लेटफॉर्म ले सट्टा खेलावत ‘सट्टा किंग’ राजा सरदार (सत्यवीर सिंह खुराना) ला गिरफ्तार करे हे।

पुलिस के जांच म पता चले हे कि रायपुर के अनीश खान ह ए नेटवर्क के मास्टरमाइंड आय, जेकर कहई म राजा सरदार ह ऑनलाइन सट्टा के कारोबार ला संभालत रहिस। अनीश खान ह राजा ला सुपर आईडी देवत रहिस, जेकर ले राजा ह आगू 70 ले 80 आईडी बाँट चुके रहिस। ए सट्टा म करोड़ों रुपय के लेन-देन होय के गोठ आगू आय हे।

कवर्धा एसपी धर्मेंद्र सिंह छवई ह बताइस कि आरोपी राजा सरदार पहिली घलो गांजा तस्करी के केस म जेल जा चुके हे। पुलिस ह ओकर तीर ले 2-3 मोबाइल अऊ सट्टा ले जुड़े इलेक्ट्रॉनिक सबूत जब्त करे हे। राजा के संगी स्वयम खुराना अऊ मास्टरमाइंड अनीश खान अभी फरार हें, जेकर बर पुलिस दबिश देवत हे। पुलिस ह ऑनलाइन सट्टा गेमिंग एक्ट के धारा 7 के तहत मामला दर्ज कर ले हे अऊ सायबर टीम आईडी मन के जाँच करत हे। आरोपी ला सोमवार के दिन कोर्ट म पेस करे जाही।