बजट 2026 : कैंसर के दवई होही सस्ता अउ टैक्स म मिलिस बड़े राहत, जानव निर्मला सीतारमण के पिटारा म का-का निकलिस
नवा दिल्ली। वित्त मंत्री निर्मला सीतारमण ह आज संसद म अपन 9वां बजट पेस करिस। ए बजट म आम जनता के सेहत अउ जेब के खास ख्याल रखे गे हे। वित्त मंत्री ह कैंसर समेत 7 गंभीर बेमारी के दवई मन ला सस्ता करे के बड़े एलान करे हे। संग म, पढ़ई-लिखई, खेल अउ विकास बर घलो कई ठन बड़े घोसना करे गे हे।
का सस्ता अउ का महंगा?
बजट के बाद अब रोज के कई जिनिस मन के दाम बदल जाही:
का-का सस्ता होइस: कैंसर अउ सुगर के दवई, जूता अउ कपड़ा, CNG, बायोगैस, बिदेस म पढ़ई अउ घूमे के पैकेज।
का-का महंगा होइस: सरब (दारू), खनिज अउ कबाड़ (Scrap)।
टैक्स अउ बैंक म राहत
कम कमाय वाले मन बर टैक्स के नियम ला अब आसान बनाय जाही। अब ‘डिडक्शन सर्टिफिकेट’ बर अफसर मन के चक्कर नई काटे ला पड़ही, ए काम अब अपने-आप (ऑटोमैटिक) हो जाही। बिदेस घूमे के पैकेज म घलो टैक्स (TCS) ला 5% ले घटा के 2% कर दे गे हे। एखर ले बिदेस म इलाज अउ पढ़ई घलो सस्ता हो जाही।
नोनी मन बर हॉस्टल अउ किसान मन ला मदद
सरकार ह देस के हर जिला म नोनी मन बर हॉस्टल (Girls Hostel) बनाही। किसान मन बर ‘भारत विस्तार’ नाम के एक एआई (AI) टूल बनाय गे हे, जेखर ले किसान मन ला खेती-किसानी के जानकारी ओखरे भासा म मिल सकही।
रेल अउ खेल म तरक्की
बजट म 7 ठन नवा हाई-स्पीड रेल कॉरिडोर (दिल्ली-वाराणसी संग) बनाय के घोसना होय हे। खेल-कूद ला बढ़ावा दे बर ‘खेलो इंडिया मिशन’ के तहत नवा ट्रेनिंग सेंटर अउ बढ़िया मैदान बनाय बर सरकार ह पैसा खरच करही।गाड़ी एक्सीडेंट के क्लेम म मिले वाला ब्याज म अब कोनो टैक्स नई लगे, एखर ले पीड़ित मन ला बड़े राहत मिलही।” – निर्मला सीतारमण
