सीएम साय के माओवादी मन ले सरेंडर के अपील: बोलिन- 31 मार्च 2026 तक हिंसा छोड़व, सरकार करही बढ़िया पुनर्वास
नारायणपुर। छत्तीसगढ़ के मुख्यमंत्री विष्णु देव साय ह बस्तर संभाग के नारायणपुर जिला ले नक्सली मन ल मुख्यधारा म जुड़े के बड़े अपील करे हें। दू दिन के प्रवास म नारायणपुर पहुंचे मुख्यमंत्री ह कहिन कि हिंसा अउ गोलीबारी के भासा ले ककरो भला नई होय हे, एखरे सेती नक्सली मन ल मार-काट छोड़ के विकास के रस्ता अपनाना चाहिए।
मुख्यमंत्री ह जोर देवत हुए कहिन कि प्रधानमंत्री नरेंद्र मोदी अउ गृहमंत्री अमित शाह ह 31 मार्च 2026 तक के आखिरी समय (डेडलाइन) तय करे हें। राज्य सरकार ह घलो बहुत बढ़िया पुनर्वास नीति लाए हे, जेकर बढ़िया नतिजा घलो देखायला मिलत हे। सीएम ह कहिन कि अभी दू महीना के समय हे, अगर नक्सली मन आत्मसमर्पण करथें त सरकार ओमन के पूरा चिंता करही।
अबुझमाड़ मैराथन म सरेंडर नक्सली मन लेत हें हिस्सा
सीएम साय ह एक बड़े उपलब्धि गिनावत हुए कहिन कि एक समय रिहिस जब नक्सली मन ‘अबूझमाड़ हाफ मैराथन’ के विरोध करत रिहिस, फेर आज ओही मनखे मन आत्मसमर्पण के बाद ए दौड़ म हिस्सा लेत हें। सरकार कोति ले शुरू करे गे ‘बस्तर ओलंपिक’ म घलो सरेंडर करे नक्सली मन बढ़-चढ़ के भाग लेत हें, जेकर ले पता चलथे कि बस्तर म बदलाव आवत हे।
