कोल्टन खदान म बड़का हादसा: जमीन धंसे ले 200 ले जादा मनखे मन के मौत, सैकड़ों अभी घलो दबे हें
Congo Mine Disaster : किंशासा। डेमोक्रेटिक रिपब्लिक ऑफ कांगो (DRC) के पूर्वी इलाका म स्थित रुबाया कोल्टन खदान म एक दर्दनाक हादसा हो गे हे। भारी बारिश के सेती भीषण भूस्खलन (Landslide) होइस, जेमं 200 ले जादा मनखे मन के जान चले गे हे। स्थानीय अधिकारी मन के मुताबिक, मरे वाला मन के संख्या 227 तक पहुंच गे हे।
हादसा ओ बखत होइस जब खदान के कमजोर जमीन अचानक ले धंस गे। मलबे म खदान म काम करेइया मजदूर, लइका अउ बाजार म व्यापार करेइया महिला मन घलो दब गे हें। बताया जावत हे कि सैकड़ों लोगन अभी घलो गड्ढा मन म फंसे हें, जेमन ल निकाले के कोसिस जारी हे। घायल मन के इलाज अस्पताल म चलत हे।
मोबाइल अउ कंप्यूटर बर जरूरी हे कोल्टन
रुबाया क्षेत्र ह पूरी दुनिया बर बहुत जरूरी आय, काबर कि इहां दुनिया के लगभग 15% कोल्टन के उत्पादन होथे। कोल्टन ले ही ‘टैंटलम’ (Tantalum) निकलथे, जेकर उपयोग स्मार्टफोन, लैपटॉप, कंप्यूटर अउ हवाई जहाज के सामान बनाए म करे जाथे।
विद्रोही मन के कब्जा अउ खतरा
ए खदान ऊपर साल 2024 ले M23 विद्रोही समूह के कब्जा हे। संयुक्त राष्ट्र के कहना हे कि ये विद्रोही मन खदान ल लूट के अपन संगठन बर पइसा जुटाथें। इहां सुरक्षा के कोनो नियम नई मानय, अउ गरीब मजदूर मन थोरक पइसा बर अपन जान जोखिम म डाल के हाथ ले खुदाई करथें। सुरक्षा के कमी के सेती अइसन हादसा कांगो म आम बात हो गे हे।
