आधार कार्ड के नवा नियम: अब अंगूठा के झंझट खतम, चेहरा देखके होही सब्बो काम; जान लव सरकार के ‘विजन 2032’ प्लान
UIDAI New Rules : नई दिल्ली। आए दिन होवत धोखाधड़ी अउ ठगी ला रोके बर अब भारत सरकार ह आधार कार्ड ला पहिली ले जादा सुरक्षित बनाय के तैयारी कर लिस हे। एखर नाम ‘आधार विजन 2032’ रखे गे हे। ए नवा बदलाव के बाद आने वाला समय म आधार के पहचान के तरीका ह पूरा बदल जाही। अब हाथ के उंगली यानी फिंगरप्रिंट के जगह आपके ‘चेहरा’ (Face Scan) ही असली पहचान बनही। जब तक चेहरा स्कैन नई होही, तब तक कोई घलो आपके आधार के गलत फायदा नई उठा सकही।
आधार के CEO भुवनेश कुमार ह बताइन कि आने वाला समय म नवा तकनीक अउ डिजिटलीकरण ला ध्यान म रखके ए प्लान ला बनाय गे हे। साल 2032 तक ए अपडेट ला पूरा करे के लछ्य रखे गे हे।
एमा काय-काय बदल जाही:
चेहरा ले होही पहचान: अभी हमर देश म रोज करीब 9 करोड़ लोगन मन आधार के उपयोग करथें, जेमा ले सिर्फ 1 करोड़ लोगन मन ही चेहरा ले पहचान (Face Authentication) के उपयोग करत हें। सरकार के लछ्य हे कि एला बढ़ाके हर महीना 100 करोड़ तक ले जाय जाय।
फिंगरप्रिंट के जरूरत नई परय: AI तकनीक के मदद ले अब बार-बार अंगूठा लगाय या बायोमेट्रिक देय के झंझट ले छुटकारा मिल जाही।
सितंबर 2026 तक फ्री: सरकार ह बताइस कि दिसंबर 2025 तक 5 करोड़ लइका अउ जवान मन के आधार अपडेट हो चुके हे। ए सुविधा ह सितंबर 2026 तक बिलकुले फ्री राही।
नवा सिस्टम अउ टेंडर:
UIDAI के चेयरमैन नीलकंठ मिश्रा के देखरेख म एक कमेटी बनाय गे रिहिस, जेमा देश-परदेश के बड़े जानकार मन शामिल हें। ए कमेटी ह अगू महीना अपन रिपोर्ट सौंपही। अभी वाला टेंडर ह साल 2027 म खतम हो जाही, ओखर बाद 2032 तक बर नवा टेंडर जारी करे जाही। एही आधार म आने वाला 5 साल बर आधार के नवा अउ सुरक्षित सिस्टम तैयार करे जाही।
