कोरबा कलेक्ट्रेट म हड़कंप: गणतंत्र दिवस म बर्खास्त नगर सैनिक ह खाइस जहर, सुसाइड नोट म अफसर मन ऊपर लगाइस प्रताड़ना के आरोप
कोरबा। छत्तीसगढ़ के कोरबा कलेक्ट्रेट परिसर म आज गणतंत्र दिवस के परब के बीच म ओ बखत हड़कंप मच गे, जब एक बर्खास्त नगर सैनिक संतोष पटेल ह जहर खाके जान देके कोसिस करिस। जहर खाय के बाद जवान के हालत बिगड़े लगिस, जेला देख के उहां मौजूद लोगन मन ह हड़बड़ा गे। आनन-फानन म ओला मेडिकल कॉलेज अस्पताल ले जाए गीस, जिहां अभी ओखर इलाज चलत हे।
घटना के खबर पावत च पुलिस अउ प्रशासन के बड़का अधिकारी मन मउका म पहुंच गे हें। जवान के करा ले एक सुसाइड नोट घलो मिले हे, जेमा ओ ह अपन ए हालत बर विभाग के बड़े अधिकारी मन ला जिम्मेदार ठहराय हे।
सुसाइड नोट म प्रताड़ना के आरोप:
जवान संतोष पटेल ह अपन सुसाइड नोट म डिविजनल कमांडेंट अउ कोरबा कमांडेंट ऊपर गंभीर आरोप लगाए हे। जानकारी के मुताबिक, कुछ दिन पहिली जिला सेनानी के खिलाफ महिला सैनिक मन ह विशाखा समिति म सिकायत करे रिहिन, जेखर बाद संतोष पटेल ला नौकरी ले निकाल (बर्खास्त) दे गे रिहिस। जवान ह ए कार्रवाई ले बहुते दुखी रिहिस अउ सुसाइड नोट म अधिकारी मन कोति ले मानसिक रूप ले परेशान करे के बात लिखे हे।
बता दन कि एकर पहिली राजनांदगांव म घलो एक सैनिक ह आत्महत्या कर ले रिहिस। अभी पुलिस ह मामला के जांच करत हे अउ ये पता लगावत हे कि बर्खास्त करे के प्रक्रिया म काय नियम मन के पालन होय रिहिस या नहीं।
