तंजानिया के सोना खदान में निवेश के नांव मां करोड़ों के ठगी, रायपुर के व्यापारी मन ल लगिस चूना
Investment Scam Chhattisgarh : रायपुर। राजधानी रायपुर ले ठगी के एक बड़का मामला आघू अईस है। तंजानिया मां सोना के खदान (Gold Mine) मां पईसा लगा के भारी मुनाफा कमाए के लालच मां रायपुर के दू झन व्यापारी मन ह करोड़ों रूपया गंवा दीन। एक ठग ह अपन आप ल खदान के मालिक बता के मनखे मन ल अईसन जाल मां फंसईस कि अब व्यापारी मन ह पुलिस ले न्याय के गुहार लगावत हें।
विदेशी निवेश के झांसा देके फंसाईन
जानकारी के मुताबिक, रायपुर के रहने वाला समर्थ बरडिया अउ मुकुल चोपड़ा ल यश शाह नांव के एक युवक ह अपन झांसा मां फंसईस। आरोपी ह ओ मन ल बताइस कि तंजानिया गणराज्य मां ओखर खुद के सोना के खदान हे। जादा मुनाफा के लालच देके ओ ह ‘एस.के.एम. बुलियन ट्रेडिंग लिमिटेड’ नांव के एक भागीदारी फर्म बनवाईस अउ भारत ले तंजानिया के बैंक खाता मां करोड़ों रूपया ट्रांसफर करवा लिस।
अईसे खुलिस जालसाजी के पोल
पईसा देके कुछ दिन बाद जब खदान मां खनई के काम शुरू नई होइस, तब व्यापारी मन ल संसो होईस। जब ओ मन ह अपन स्तर मां जांच कराइन, त पता चलिस कि तंजानिया के कानून के हिसाब ले कोई भी विदेशी नागरिक ओहां सोना खदान के सीधा मालिक या भागीदार नई बन सके। आरोपी ह निवेश पाए बर फर्जी अउ कूटरचित दस्तावेज देखा के ओ मन ल ठगे रिहिस। एखर अलावा, पीड़ितों ल पता चलिस कि ओखर जानकारी के बिना फर्म के विदेशी खाता ले 70 हजार अमेरिकी डॉलर (लगभग 58 लाख रूपया) निकाल ले गे हे।
पुलिस मां शिकायत अउ जांच शुरू
धोखाधड़ी के शिकार होय के बाद व्यापारी मन ह एसपी कार्यालय अउ सिविल लाइंस थाना मां लिखित शिकायत दर्ज कराए हें। व्यापारी मन के कहना हे कि ये एक सोचे-समझे षड्यंत्र अउ अमानत मां खयानत के मामला हे। पुलिस ह मामला ल गंभीरता ले देखत दस्तावेज अउ बैंक ट्रांजेक्शन के जांच शुरू कर दे हे।
