बजट 2026: इतवार के घलो खुलही शेयर बाजार! वित्त मंत्री पेश करिहीं बजट, जानव ट्रेडिंग के पूरा टाइम-टेबल

Stock Market Open on Budget Day 2026 : मुंबई: आम तौर पर सनिच्चर अऊ अतवार के शेयर बाजार बंद रहिथे अऊ निवेशक मन छुट्टी मनाथें, फेर ए दारी मामला कुछू अलग हे। 1 फरवरी, अतवार के दिन बॉम्बे स्टॉक एक्सचेंज (BSE) अऊ नेशनल स्टॉक एक्सचेंज (NSE) दूनों खुल्ला रहिहीं। एखर सबले बड़े कारण आय ‘केंद्रीय बजट 2026’। वित्त मंत्री निर्मला सीतारमण ए दिन देस के बजट पेश करिहीं, जेकर सीधा असर बाजार के चाल ऊपर परथे। एला देखत हुए एक्सचेंज मन ह अतवार के घलो ट्रेडिंग चालू रखे के फैसला ले हें।

अतवार के घलो होही शेयर के ले-दे

BSE अऊ NSE डाहर ले जारी करे गे सर्कुलर के मुताबिक, बजट वाले दिन लाइव ट्रेडिंग सेशन होही। एखर मतलब ये हे कि आप मन अतवार के घलो आम दिन मन के बरोबर शेयर मन के खरीदी-बिक्री कर सकिहौ। ये सुविधा सिरिफ कैश मार्केट (Equity) मां बस नहीं, बल्कि वायदा बाजार (F&O) अऊ कमोडिटी सेगमेंट मां घलो मिलही। बाजार खुल्ला रहे ले निवेशक मन ला बजट के घोषणा मन ऊपर तुरंते फैसला ले के मौका मिलही अऊ ओमन ला सुमार (सोमवार) के अगोरा नहीं करे ला परी।

का रही ट्रेडिंग के समय?

अतवार होय के बाद घलो ट्रेडिंग के समय ला बिल्कुल आम दिन मन के बरोबर रखे गे हे ताकि निवेशक मन ला कोनो परेशानी झन होवय:

• प्री-ओपन सेशन: बिहनिया 9:00 बजे ले 9:08 बजे तक

• नॉर्मल ट्रेडिंग: बिहनिया 9:15 बजे ले मंझनिया 3:30 बजे तक

बजट अऊ बाजार के खास रिस्ता

बजट के बखत जब टैक्स, सरकारी खरचा, इंफ्रास्ट्रक्चर अऊ बैंकिंग जैसे सेक्टर बर बड़े एलान होथे, त बाजार मां भारी उतार-चढ़ाव देखला मिलथे। बाजार खुल्ला रहे ले निवेशक मन बजट के खबर के हिसाब ले अपन शेयर ला तुरंते बेंच या खरीद सकिहीं। हालांकि, BSE ह साफ कर दे हे कि 1 फरवरी के सिरिफ ट्रेडिंग होही, ओ दिन T+0 सेटलमेंट (तुरंत सेटलमेंट) के सुविधा नहीं मिलही।

26 साल बाद बनत हे अइसन संजोग

भारतीय संसद के इतिहास मां घलो ये दिन बहुत खास होही। साल 2000 के बाद ये पहली दारी होवत हे जब केंद्रीय बजट अतवार के दिन पेश करे जावत हे। एखर पहिली साल 2015 अऊ 2025 मां सनिच्चर के दिन बजट पेश करे गे रिहिस, फेर अतवार के बजट आना एक बड़े बात आय।