बाबा महाकाल के सरन मा टीम इंडिया के हेड कोच गौतम गंभीर, भस्म आरती मा सामिल होके लिन भगवान के असीरवाद
Gautam Gambhir Mahakaleshwar Temple : उज्जैन। भारतीय क्रिकेट टीम के मुख्य कोच गौतम गंभीर आज सुबह भक्ति अउ सरधा मा डूबे नजर अइन। ओमन बल्लेबाजी कोच शीतांशु कोटक के संग उज्जैन के विश्व प्रसिद्ध श्री महाकालेश्वर ज्योतिर्लिंग मंदिर पहुंचिन, जिहां ब्रह्म मुहूर्त मा होवइया भगवान महाकाल के बिसेस भस्म आरती मा सामिल होइन। नंदी हॉल मा बइठ के दूनों कोच मन ह करीब दो घंटा तक बाबा महाकाल के अराधना करिन। चांदी द्वार ले पूजा-पाठ करिन अउ जलाभिषेक घलो करिन। मंदिर प्रबंधन कोति ले गंभीर के सुवागत करे गिस अउ ओमन ल बाबा के प्रसाद अउ स्मृति चिन्ह भेंट करे गिस।
दरसन के बाद मीडिया ले गोठबात करत हुए गंभीर ह अपन गहरी सरधा जताइस। ओमन कहिन, “सबले पहिली बात तो ये हे कि बाबा ह मोला बुलाइस, त मोला इहां दरसन करे के सुभ अवसर मिलिस। इहां के व्यवस्था बहुत सुग्घर रहीस अउ दरसन बहुत सांति ले होइस। मोला पूरा बिसवास हे कि बाबा ह मोला फेर बुलाही अउ मैं जल्दी इहां वापस आहूं।”
बता दन कि टीम इंडिया ह इंदौर मा न्यूजीलैंड के खिलाफ रविवार के अपन तीसरा वनडे मैच खेलही अउ सीरीज जीते के कोसिस करही। एकर ले पहिली राजकोट मा भारतीय टीम ल हार मिले रहीस। अब सबो क्रिकेट प्रेमी मन के नजर ये मैच मा टिके हे।
